Palace tan Eze a khel zel dawn

Crystal Palace midfielder Eberechi Eze chuan Palace tan rinawmna thu a tiam a, kum thum leh a chanve chhung atan contract thar a ziak - kum 2027 thleng Palace-ah hian a khel ang.

Kum 25 mi Eze hian kum 2020 khan Queens Park Rangers aṭangin Palace hi pound maktaduai 19.5-in a zawm a, season hmasa khan Palace tan league-a goal khung hnem ber niin, goal 10 a khung bakah assist vawi li a nei.

Season hmasa lawka treble nomawi chawitu Manchester City chuan Eze hi nipui lai khan rim mah se, Etihad Stadium-ah beisei angin a kal ta lo a, tunah phei chuan Palace tana khel zel turin contract thar a ziak.

England tana vawi hnih inlan tawh Eze hi a naupan laiin Arsenal, Fulham, Reading leh Millwall tan te a khel a, a puitlin hnuah QPR aṭanga bul ṭanin, Wycombe Wanderers-ah loan-in a khel tawh bawk.

Eze hian Inrinni zan khan Everton an hmachhawn ṭumin goal hmahruai a khung a, inkhelah erawh Toffees lakah 3-2 in an chak lo.