A chung berah Inter Milan

Inter Milan chuan Serie A champion an tumzia a takin a lantir leh ta. Pathianni zan khan Inter hian Federico Dimarco leh Hakan Calhanoglu te goal hmangin Frosinoe chu 2-0 in an hneh.

Inrinni zan khan Juventus chuan Cagliari hnehin Italian football inelna sang berah hian hma an hruai lailawk a, mahse tunah chuan khelh zat inangah Inter hian point 31 hmuin hma an hruai leh ta - Old Lady aiin point hnihin an sang zawk.

Simone Inzaghi naute hian goal an khung awlsam mai bik lo. Tunlaia khawvel striker hriam leh hlauhawm berte zinga mi Lautaro Martínez-a khung tur chu keeper Stefano Turati-a'n a lo dansak.

Chawlhlawk hma hretin Federico Dimarco chuan mual laiah ball a chang, half way line bul lawk a la nih avangin hlauhawm lo tura ngaih a la ni. Mahse, Italian wing back hian goalkeeper Turati awmna a fuh lo tih a hmu.

Hla zet aṭangin goal lamah a pet thut - Frosinone goalkeeper Turati hi insiamrem nghal tum mah se a tlai tawh, ball lo kal hi lo zuan mah se a dang thei ta lo, goal ropui zinga mi a ni.

Second half tirah Inter hian chak nemngheh nan Calhanoglu-a penalty hmangin an goal hnihna an khung a, harsa lutuk loin point thum an hlawh chhuak - international break an hman zawh hnua an match hmasa berah Juventus an lenchilh ang.

Inter Milan coach Simone Inzaghi chuan, "Champion tur sawi a la hun lo, tunah hian match 13 chauh kan la khel. A awmzia chu league khelh tur hmun thuma ṭhena hmun khat chauh kan la khel tihna a ni, international break zawh hunah fiahna chu a lo thleng dawn," tiin a sawi.

Inter leh Juve an inkhel dawn a ni satliah lo. Serie A match dangah Napoli leh Atalanta an intawng dawn a, team ṭha leh champion tum zinga mi AC Milan chuan Fiorentina an mikhual bawk ang.