Ropui takin Inter Milan tho chhuak

Goal hnih an phurh hmasak hnuah Inter Milan chu ropui taka tho chhuak lehin AC Milan 4-2 in an lehthal, coach Antonio Conte naute hian Juventus nih rualin Serie A champion an tum ngam tih an nemnghet.

Champion lai Juve chu Hellas Verona lakah an tlawm a, an elpui dang Lazio chuan Parma 1-0 in an hneh thung. Milan Derby khelh hma chuan Inter hi pathumnaah an awm lailawk, inkhel ropui a zawh meuh chuan Conte enkawl team hi a chung berah an awm.

AC Milan tan Zlatan Ibrahimovic leh Ante Rebic ten goal khungin chawlhlawk laiin 2-0 in hma an hruai. Second half-ah Inter lamin Marcelo Brozovic, Matias Vecino, Stefan de Vrij leh Romelu Lukaku te hmangin an chhanglet.

Stefano Pioli kaihhruaina hnuaiah Milan an khel ṭha tluang a, league match an khelh hnuhnung 11-ah vawi khat chiah chak loh an neih avangin inrintawkna pawh an nei sang; chak tura rinkai an nih hnuah an tlarhnung pawp an tuar thung.

Zlatan Ibrahimovic leh Simon Kjaer ten inkhel bul an ṭan thei a, midfielder Ismael Bennacer-a'n hremna hmang zo tawh mah se tlarhma pui turin Hakan Calhanoglu dahluh zawk a ni; mualsir lamah Ante Rebic a awm bawk.

Turkey international Calhanoglu-a'n inkhel tir lamah hla deuh tak aṭangin goal ban a pet per a, Swede striker Ibrahimovic ball tauh tlak chu Rebic-a'n awlsam takin a khung. Kum 38 mi Ibra hian corner aṭanga ball kal hnai takah a tauh luh bakah, second half-ah goal ban a tauh per.

Juve an chak lo tih hresa chungin Inter an inlan, phur viau mah se goal hnih an chhuah hmasa. Manager huaisen Conte-a'n chawlhlawk laiin a naute a fuih ṭha tih a lang, midfielder Brozovic-a'n box pawn aṭanga ball kang lai hlap lutin beiseina a siam thar.

Hrem vangin Lautaro Martinez chhawr thei lo mah se Alexis Sanchez a awm, Chile international hian keeper a vir khum hnuah Vecino khung tur a siamsak. Stefan de Vrij-a'n corner aṭanga a ball hmuh ṭha zeta tauh lutin hma an hruai let.

Inter lamin an duhtawk mai lo, striker Lukaku chuan hun tawp hma chiahin an goal lina a khung. Belgium striker goal hi Victor Moses siamsak a ni, wingback Moses hi Conte-a'n Chelsea a enkawl laia Premier League champion an nih theih nana player pawimawh kha a ni.

Inter Milan manager Antonio Conte chuan, "Season kan hman laia a pawimawh lai tak chu a ni, zep tur a awm lo, zan nuam leh hlimawm a ni chiang hle. Hun chanve hmalam kha chu a harsa takzet, a hnu lamah erawh risk kan la fuh.

"Nomawi chungchang sawi nan a la hma, chutihrualin duhthusam leh thil tum erawh kan nei thiang vek," a ti. Season riat zet Serie A champion ni tawh Old Lady lak aṭanga nomawi chhuhsak an tum ngam.

Milan manager Stefano Pioli chuan, "Team ṭha tak lakah kan dinhmun a ṭha hman hle, kan inkar sawrzim theihna hun ṭha kan bawhpelh ringawt kha a pawi takzet. Tun season bika first half kan khelh ṭhat ber chu a lo thlawnin a liam," tiin second half an khelh chhiat vanga a lawm loh thu a sawi.

Inkhel ngaihven hlawh bik a awm a, ram hrang hrangah inkhel boruak sang leh lawm hlawh bik a awm ṭhin. Italy-ah chuan Milan club pahnih inkhel 'Derby della Madonnina' hi ngaihven hlawh a ni, Italian football a tlakhniam deuh lai pawhin a boruak a sang thei hle.

Italian club lian pahnih hian khelmual atan San Siro an inṭawm a, tun ṭumah hian Inter Milan chu mualneitu zawk an ni, fans tan ticket pawh an nei tam zawk. Match puitling vawi 225 an khel tawh a, record nei ṭha zawk Inter hi vawi 82 an chak tawh.