Real chak zanah Barcelona an chelh ding

Pathianni zan La Liga in-khel-ah club lian pahnih Real Madrid leh Barcelona an inlan a, Real-in awlsam taka hnehna an chan laiin Barca erawh in chak result an hlawh chhuak zo lo.

Real Madrid hian an mi-khual Sevilla chu 4-0 laiin an sawp a, Barca-in khualmualah Villarreal chu goal hnih ve ve khungin an inhnehtawkpui thung.

Chak nuamsa Real

Santiago Bernabeu-a in-khel-ah Real-in goal an khung hma a, an mikhual lakah ṭhat an chhuah duh lo. Inkhel ṭan
aṭanga minute rukna lekah Karim Benzema chuan goal ropui a khung a, France squad-a an koh loh striker hian ram tana khelh a phu zia a lantir.

First half-ah goal dang lut tawh lo mah se second half-ah goal thum kan hmu thung. Minute 64-naa Cristiano Ronaldo-a'n goal a khung hnu lawkah Gareth Bale-a'n Real goal thumna a khung ve leh a, British player zinga La Liga-a goal khung hnem ber a ni ta. Real chak nem ngheh nan minute 86-naah Jese Rodriguez chuan an goal lina a khung ve bawk.

Welsh winger hian goal a khung bakah woodwork vawi hnih lai a pet per a, a goal khung pakhat chu offside vangin pawmsak a ni lo bawk. Replay en erawh chuan Bale-a goal khung hi offside niin a lang lo.

Sevilla-in penalty hmangin goal khungna hun ṭha nei ve mah se Kevin Gameiro-a'n penalty hi goal-ah a chantir thei lo. Referee chetsual vanga lawm lo erawh Real chauh an ni bik lo a, Gameiro goal khung offside lo nia lang pawmsak an ni lo chu Sevilla hian an ui hle ang - hetih laia Real hmahruaina chu 1-0 chauh a ni.

Bale-a record

Kum 26-a upa Bale hian September, 2013 khan Tot-tenham aṭangin pound mak-taduai 85-in Real a zawm a, league match 76-a inlanah goal 43 khungin hliam vanga a buai fo chunga a goal khung zat hi inchhuanpui tham a ni.

Bale hian British player zinga La Liga-a goal khung hnem ber record chelh tur hian Barcelona tan vawi 103 a inlana goal 42 khungtu Gary Lineker-a record a khum a, heti zat goal khung tura an match mamawh zat hi a intam hleih hle.

Barca chak zo lo

Villarreal khelmuala inkhel-ah Barcelona-in goal hnihin hma hruai zet mah se an mikhualna ramah an goal hnih khung an hum zo lo a, inkhel a tawp meuh chuan 2-2 in an inhnehtawk.

Inkhel ṭan aṭanga minute 20-na lekah Ivan Rakitic hmangin Barca-in goal hmahruai an khung a, minute 41-naah Neymar chuan penalty sawisel hlawh tak hmangin an goal hnihna a khung ve bawk.

Mahse, mualneitu Villar-real-in awlsam taka tlawm mai an tum lo. Minute 57-naah Cedric Bakambu finishing tawih lutuk hmangin goal khat an khung a, minute 63-naah Barca defender Jeremy Mathieu chuan an lamah ti lut bawkin tun season-a Barcelona player-in an lama goal an tih luh hmasa ber a ni. Hun tawp thlenga goal dang a luh tawh loh avangin team pahnih hi 2-2 in an inhnehtawk.

Enrique thukhawchang

Barcelona manager Luis Enrique chuan, "He league-a team ṭha ber berte he hmunah hian an lo chak lo fo tawh a, draw result kan hlawh chhuak hi kan tan chuan result ṭha tak a la ni tho mai. Hnehna chang thei dinhmuna kan din rualin chak lo thei dinhmunah kan ding bawk a, kan tan chuan result chhia tia sawi chi a ni lo," tiin Villarreal nena an inhnehtawk chu result awm tak a nih thu a sawi.

Valencia chak lo

Europa League aṭanga hnawhchhuah an nih hnu lawkah Gary Neville-a'n a naute hnehna a chanpui zo lo a, Celta Vigo lakah 2-0 in an tlawm. Manchester United defender hlui Neville-a tan La liga match thum chhung a zawna hnehna an chan zawh lohna a ni ta.

League match riat chiah khel tur nei tawh Valencia dinhmun a him lo a, club an la hmachhawn tur zingah Barcelona, Real Madrid, Villarreal leh Sevilla-te an tel avangin season tharah La Liga an khel lo a nih pawhin a mak lo ang.

Gary Neville chuan, "Lea-gue match riat khelh tur la awmah hian kan rilru zawng zawng kan pek a ṭul a, ka ngaihdanah chuan kan dinhmun hi a him lo takzet. Fan-te an lungawi lo a nih chuan ka hrethiam a, anmahni ang thoin keipawh kan result avang hian ka lawm lo hle," tiin fan-te a dem loh thu a sawi.