Benitez-a'n Magpies a chak pui thei lo

Pathianni zan Premier League relegation battle-ah Newcastle United leh Sunderland an inhma-chhawn a, chak zawk awm loin team pahnih hi 1-1 in an inhnehtawk.

Tyne-Wear Derby-ah hian Sun-derland-in Jermain Defoe-a goal hmangin hma hruai mah se Magpies-in hun tawp dawna Aleksandar Mitrovic goal khung hmangin an si phurh an sut a, Black Cats lakah match ruk chhung a zawna an tlawm tawhna chu a thai reh.

Team pahnih hi table hnuai lam club pathum zingah an awm chhun-zawm zel a, Television deal thar avanga hausa thar Premier League aṭanga Championship lama an tla thla a nih chuan an sum hloh tur zat hi pound maktaduai 100 vel zet a ni.

Benitez-a zam lo

A match hnihna atana Newcastle kaihruaitu Rafael Benitez chuan, "Kan match tawp ber leh minute tawp ber thlengin kan beih a ngai dawn a, chu chu kan tih ngei a ngai a, kan ti ngei bawk ang," tiin hmalam an pan tur thu a sawi.

Real Madrid manager hlui chuan sawi chhunzawmin, "A hma kha chuan kan dinhmun a hlauhawm em em a, he hmuna ka lokal chhan chu he team hnena inrintawkna pe tur leh hmasawn turin a ni," tiin a zam lo.

Benitez chuan sawi chhunzawmin, "Chance tam tak kan insiam a, goal khung tumin vawi tam kan bei bawk. Mitrovic leh Papiss Cisse emaw ka striker dangte pawhin goal dang an la khung dawn chauh a, kan beiseina hi a la chuai lo," tiin season thara Premier League khel zel turin a inringtawk.

Allardyce a lawm lo

Chak tura an inbeisei tawh hnua draw result an hlawh chhuah avangin Allardyce a lawm lo a, 'Big Sam' chuan, "Goal chhuah loh hi kan zir thei lo a nih chuan a pawi thui khawp ang. Chak tura goal hnih tal khung ṭhin mamawh kan ni a, vanduaithlak takin goal hnih kan khung lo a, hun tawp dawnah goal kan chhuah bawk," tiin a lawm lo hle.

Balck Cats hian tun season-ah inelna hrang hrangah match 18 chhung chu a zawnin goal an chhuah tawh a, an tlarhnung lamin 'Big Sam' a mang an ti ang hi a awm lo hran lo.

Sunderland manager chuan sawi chhunzawmin, "Second half-ah khan engvanga chawl hahdam mai nge kan nih ka hrethiam lo a, hun tawp dawna kan chetsual vangin point hnih kan hloh a ni. League match riat khelh tur kan la hmabak a, match liah tal chak result kan hlawh chhuah a pawimawh ang," tiin an dinhmun a sawi fiah.