Serie A record siamtu Buffon

Juventus goalkeeper Gianluigi Buffon chuan Serie A-ah a zawnin minute 973 chhung goal a chhuah lo a, Italy league-ah goal chhuah lo rei ber record thar a siam. AC Milan keeper Sebastiano Rossi record lo siam tawh (minute 929) chu a rawn khum ta a ni.

Pathianni zan inkhel-ah Juventus hian Torino 4-1 in an sawp a, Turin club tan hian Paul Pogba-a'n freekick aṭangin goal hmahruai a khung a, Sami Khedira leh Alvaro Morata te chuan goal hnih ve ve an khung zui bawk. Juve chak chiang mah se Real Madrid midfielder hlui Khedira hnawhchhuah a nih avangin an lawm a kim lo.

Torino tan Andrea Belotti chuan minute 48-naah penalty aṭangin goal a khung a, Buffon hian goal chhuah mah se a minute zawng chuan record a lo siam hman tho a ni. Italy legend hian league match-ah January 10-a Samp-doria 2-1 a an hneh ṭuma goal a chuah hnuah goal a chhuah leh vawi khatna chiah a ni nghe nghe.

Champions League-ah Bayern Munich hneh lo hlim mah se Juve hian league-ah erawh an chet ṭhat an chhawm nung zel a, an match hnuhnung vawi 20 aṭanga vawi 19 hnehna chang theiin point 70 hmuin hmahruaitu an nih chhunzawm zel a, pahnihna Napoli aiin point hnihin an sang zawk.

Napoli an chak

Inrinni zan inkhel dangah league title beisei ve mektu Napoli chuan si an phurh zet hnuah Genoa 3-1 in an hneh a, Juve an um ve zel.

Genoa tan Tomas Rincon chuan beisei loh takin goal hmahruai a khung a, mahse second half ṭan aṭanga minute ruk hnu lekah Gonzalo Higuain-a'n an si phurh a sut. Argentina international Higuain hin minute 81-naah tun season-a a league goal 31-na khung zuiin a team hma a hruai pui a, Omar El Kaddouri chuan injury time-ah an chak nemngheh nan goal khat a khung ve bawk.