T20 World Cup Sri Lanka lakah West Indies chak awlsam

Pathianni zan khan Twenty20 World Cup match hnih a awm a, inkhel hmasa zawkah West Indies chuan awlsam takin champion lai Sri Lanka chu wicket sarihin an hneh.

Bangalore khawpuia inkhelah hian bat hmasa zawk Sri Lanka-in over 20-ah run 122 an siam a, mi pakua an hloh. Sri Lankan batsman zingah Thisara Perera chuan ball 29 a hmachhawnah run 40 a vaw chhuak a, batsman dangten an ṭawiawm ṭha tawk lo.

West Indies bat hun a thleng a, over 18.2-ah run 127 vaw chhuakin mi pathum chiah an hloh a, awlsam takin an chak. Windies tan Adreb Fletcher a khel ṭha fal a, ball 64 a hma-chhawnah run 84 siamin a tawp thleng a dam.

Pathianni zan Twenty20 World Cup inkhel dangah South Africa chuan run 37-in Afghanistan an hneh bawk. Mumbai khawpuia inkhelah hian South Africa chuan over 20 chhungin run 209 an vaw chhuak a, mi panga chiah an hloh.

South Africa tan AB de Vil-liers-a'n innghah ngamna a nihzia a pholang a, ball 29 lek a hmachhawnah run 64 vaw chhuakin a khel ṭha takzet. South African batsman zingah run 45 siamtu Quinto de Kock leh run 41 siamtu Faf du Plessis-te an khel ṭha hle bawk.

Afghanistan-in over 20 chhungin run 172 an vaw chhuak a, mi sawm hlohin an tlawm chiang hle. Afghan batsman zingah Mohammad Shahzad chuan ball 19 a hmachhawnah run 44 siam mah se a ṭhianten an ṭawiawm ṭhat tawk loh avangin a tlawm zawkah an ṭang ta a ni.

Nizanah inkhel pakhat chauh a awm a, Australia leh Bangladesh inhmachhawnin he chanchin buatsaih a nih lai hian an result erawh kan hre hman lo.

Zaninah inkhel pakhat a awm dawn a, New Zealand leh Pakistan-te chu zan dar 7:30-ah an inhmachhawn ang.