Tlai dar 2:00-ah NECS Cup Final Armed Veng Vs ¸

Vawiin tlai hian NECS Cup champion lai Armed Vengin nomawi humhim tumin Mizoram pum huapa an larpui an jersey eng nen Lammual an lut ang a, an khingpui tur chu Mizoram Premier League-a club ṭha nei thei Bethlehem Vengthlang an ni.

Aizawl DFA leh TṬ Royte te buatsaih NECS Cup vawi linaah hian team 87 an tel a, final hi tlai dar 2:00-ah khelh tur a ni. Armed Veng ṭantute Zomuanthanga Stand leh Zohminga Zote Stand-ah te ṭhut tur niin BVT ṭantute K. Kawla Stand leh S. Malsawmtluanga Stand-ah ṭhut tur a ni a, tlang lama ṭhutna awm chu neutral supporter-te tana zuah a ni.

Phuba lak

2015 NECS Cup semfinal-ah Armed Vengin minute 58-naa B. Zoramthanga goal hmangin BVT an hneh a, an champion zui bawk. BVT hian nikuma anmahni pet thlatu Armed Veng an pumpelh lo hi an lawm zawk a, champion lai hneh ngeia champion nomawi chawi an duh.

BVT coach Lalsangzuala Hmar chuan, "Ka player-te hian Armed Veng hmachhawn hi an châk a, practice banah te hian insut leh hram an duhthu an sawi ṭhin. Tum nawn leh an duh a nih chuan kan hlau lo tihna a ni. Mipui lam hian quarterfinal aṭang tawh khan kan veng tlak hun tiin an sawi a, tunah chuan Pathian khawngaihna zarah final kan lut. BVT mipui hian hlauthawng lo leh rinhlehna nei loin min thlir se kan duh," tiin chak tura a inrintawk thu a sawi.

Champion lai nge nge

Armed Veng hian NECS Cup-ah a zawnin final vawi thum an lut tawh a, tunah hian NECS Cup leh CYMA Football nomawi kawltu an ni. Veng leh veng inelnaa Mizoram puma record nei ṭha ber Armed Veng hi BVT hmaah an zam lo.

Armed Veng coach Lalram-chuana Ralte chuan, "MPL club an nei a, team ṭha chu an ni ngei mah se Armed Veng hian midang game tichhe tur ringawtin game plan kan siam ngai lo. Kan khelh dan pangngaiin kan khel ang a, player ṭha deuh bik te an nei a nih chuan kan veng uluk ang. A hmaa ka sawi tawh ang tho kha a ni a, team ṭha kan tum leh team chhe kan tumin kan khelh dan hi a ngai reng a, BVT an nih vangin kan hlauhthawng phah lo," tiin an inrintawk thu a sawi.

Khelmual lam

Armed Vengin semifinal-a an chhawr theih loh defender C. Lalropianga a rawn kir dawn a, team inghahna erawh Mizoram Police forward Lalfakzuala a la ni reng tho. Fakzuala baka hian midfielder Lalawmpuia Hnamte leh defender B. Zoramthara te en bik a sual lo ang.

Defender B. Sena hian BVT lamah chakna goal a khung tawh a, Armed Veng South an hneh
ṭumin goal pawimawh a khung a, final an luh theih nan Venghlui lamah penalty shootout-ah chakna goal a khung bawk.

BVT team enkawltu hi Lal-sangzuala Hmar hian BVT FC bakah MPL club Chanmari FC a enkawl tawh a, Mizoram team a enkawl tawh bawk. Sanga hian MFA Super Cup-ah Aizawl FC hneha BVT FC a champion pui avangin Armed Veng vawi hnih a hmachhawn meuh chuan tawnhriat a ngah tawh hle. BVT boss hian Armed Veng kan hneh loh ṭumin tihsual kan nei a, tunah chuan chetsualna hi sawi a la rem lo a, field chhungah kan siamṭha ang tiin Vanglaini palai a hrilh.

BVT hian MPL player an kawl nual a, an player langsar chu defender MS Dawngzela (Notea), Laldingngheta, Lalram-mawia leh PC Zosanga te an ni a, hmachhawn châkawm an ni lo.

Mipui lam

Armed Veng hian nikum khan an supporter-ten player-te au phur an thiam vang te, mahni veng sulhnu an tihfai ṭhat vang te leh au mawi vang tein Community Prize an dawng a, kuminah pawh dawn leh ngei an tum.

Armed Veng coach Ram-chuana chuan, "Veng mipui an ṭang a, banner te nen kan thawkchhuak ang. Amaehrawhchu semifinal-a buaina chhuak ang kha chu chhuak tawh lo se ka duh. Veng hruaituten mahni veng mipui thunun se, mipuiin player ti phur zawngin mawi takin au se tih hi ka duh dan a ni," tiin Vanglaini palai a hrilh.

Lalsangzuala Hmar ngaih-dan a dang lo, BVT boss chuan, "Boruak ṭha kan duh, mipui au danah pawh intih elna ṭawngkam tel lo se kan ti. Vengchhung mi-pui an phur a, min ṭawiawmna
ṭha tak hi nomawi nena chhan let ngei kan tum," tiin a sawi.

Armed Veng-in tun hmain nomawi an chawi ṭhin a, tun thlengin an la bansan lo. BVT erawhin kum 2002 khan CYMA Football final-ah Dinthar hneh loin nomawi an thlir liam a, tun
ṭumah hian nomawi chawi theih-na hun remchang an nei. Inkhel hi LPS-ah live telecast a ni ang.

FINAL KALKAWNG

Second Round

Armed Veng 3 - 1 Tuivamit

Armed Veng : Lalbiakhlua 27'; Lalawmpuia Hnamte 27', 42'

Bethlehem VT 5 - 0 North Serzawl

BVT: Lalzatluanga 16'; P.C Zosanga 32'; Zoremsanga 54'; Lalrammawia 87'; Amos Lalnienga 85'

Round of 32

Armed Veng 2 - 0 Samlukhai

Armed Veng : Vanlalduatsanga 13', 83'

Bethlehem VT 2 - 0 Maubawk

BVT: P.C Zosanga 4', 75'

Round of 16

Armed Veng 5 - 0 Model Veng

Armed Veng : C. Lalropianga 4'; Laltlanhlua 42'(OG); Lalbiakhlua 73'; Vanlalduatsanga 86'; Lalmuanzova 88'

Bethlehem VT 4 - 0 Salem Veng

BVT: Michael Lalneihtira 31'; P.C Zosanga 43', 52'; Amos Lalnienga 79'

Quarterfinal

Armed Veng 3 - 2 Armed Veng South

Armed Veng : Lalmuanzova 56'; B. Zoramthanga 74', 90+4'

Bethlehem VT 1 - 2 Chhinga Veng

BVT: Lalmawizuala 26'; Laldingngheta 81'

Semifinal

Armed Veng 1 - 1 Venghlui

Armed Veng : Lalfakzuala 36'

Penalty Shootout-ah Armed Veng 6-5 in an chak

Bethlehem VT 2 -1 Vaivakawn

BVT : Lalrammawia 33'; Laldingngheta 55'