Reds vûl lai thliaktu Southampton

Hun engemaw tichhung chu Liver-pool harhtharna vung takin a kalchho niin a lang a, hun tawpah erawh Jurgen Klopp-a'n mualneitu thochhuah leh dan fak bak tih theih a nei lo. Pathianni zan khan Southampton-in goal hnih an chhuah zet hnuah Liverpool 3-2 in an lehthal a, St Mary's Stadium-ah tun hnaia Manchester khaw club pahnih United leh City hnehtu Reds an mualpho.

Reds an vûl

Inkhel an ṭan chauh tiin Saints forward Shane Long chuan Dejan Lovren lakah penalty besei mah se penalty pek a ni lo. Hemi hnu hi chuan Liverpool-in ro an rel a, Philippe Coutinho leh Daniel Sturridge te'n goal ropui bik an khung a, midfielder Joe Allen-a'n chance ṭha a hlah hnu lawkah goal a khung tawh emaw ti mah se offside vangin pawm a ni lo a, referee-in thutlukna a siam tlai hle.

Reds an pul

Goal nga chuang khung theih-na hun ṭha nei mah se Reds-in goal hnih lek an khung an tuar a, second half ṭantirh aṭanga lut Mane leh Victor Wanyama te an ngam lo. Second half
ṭan chiahah lut thar Martin Skrtel-a'n Graziano Pelle a ti tluk vangin penalty a chawi a, first half-a penalty niawm tak pe lotu referee-in a tihsual a siamṭha ni maiin a lang.

Senegalese striker Mane-a'n penalty hlah mah se goal hnih (64', 86') dang a khung zui a, a goal khung inkarah hian Italian striker Pelle chuan goal khat a khung ve bawk.

Eng nge an sawi?

Southampton manager Ronald Koeman chuan, "European com-petition khelh kan la tum reng a, beiseina nei zel tura player-ten huaisen taka point thum an sual chhuah avangin ka lawm hle a ni," tiin a sawi.

Liverpool manager Jurgen Klopp chuan, "First half-a kan khelh dan kha duhthusam a ni a, second half-ah erawh an khelṭha zawk tih kan pawm a ngai a ni. Goal thum an khung a, keini chuan kan khung tling ve lo. Hei hi football kalhmang a ni," tiin a khingpuite a fak.

Match 31 khelhah pasarihnaa awm mek Saints-in point 47 an hmu a, Liverpool-in vawi 29 khelhah point 44 hmuin pakuanaah an awm ve bawk. League-ah a zawna vawi thum an chak hnuah Reds an tlawm a, April 2-ah Tottenham Hotspurs an hmachhawn dawn avangin Klopp-a leh a hote hi season thara European competition khel turin an dinhmun a ṭha lo.