MFA Cup final-ah Siaha Vs Chhinga Veng

Siaha FC-in harsatna nei loin 2016 MFA Cup final an lut a, an khingpui tur Chhinga Veng FC-in vannei takin inelna thlengtu New Serchhip chu penalty shootout-ah an hneh. Final hi March 23 hian Khawtletlang Field, Serchhip-ah khelh a ni ang.

Siaha tan MC-a

Nimina khelh semifinal hmasa zawkah Siaha FC tan MC Malsawmzuala'n hmahruaina goal a khung a, Champhai khaw club Zotlang FC-in Lalchhuanpuia hmangin an sut a, goal an khungna kawngah Siaha offside trap an bum nalh hle.

Inkhela chungnung zawk Siaha FC tan A. Beihrokhai-a'n minute 27-naah chakna goal a khung a, goal khungtu pahnihte hian chance ṭha dang an hlah avangin hun tawp lamah Siaha lamin pressure an ngah phah. Siaha FC tan vice captain Laltlanchhuaha a khelṭha a, goal venhim kawngah right back hi a ṭangkai hle.

Siaha coach NG Beirona chuan, "Awlsam taka chak tur ni mah ila kan hun ṭha neih kan hmang ṭangkai tawk lo a ni. Inkhel bul kan ṭan ṭhat angin a tawp kan khar ṭha tawk lo a, final-ah chuan minute 90 chhung kan khelhṭhat a ṭul tawh ang," tiin an sawi.

Penalty a ngai

Chhinga Veng FC-in group stage-ah Siaha FC an hneh thei a, Siaha hian New Serchhip 0-4 laia sawptu Zotlang FC an hneh thei bawk. Amaherawhchu Chhinga Veng hian New Serchhip khelh
ṭhat ber ṭum an tawng a, penalty hmangin an chak thei hram.

Aizawl DFA champion-in first half tawp hmain Vanlallawma goal hmahruai a khung a, second half tirah penalty aṭangin a khung leh bawk. New Serchhip-in supporter an nei ṭha a, freekick hmanga an chance neih an hmang ṭangkai bawk. Left back Henry Lalhruaitluanga'n freekick aṭangin vawi hnih a khung a, 2-2 a ni.

Extra time-ah goal a luh loh hnuin penalty hmangin chak zawk zawn a ni a, Chhinga Veng 4-3 in an chak.

Chhinga Veng manager Lalthanzama Vanchhawng chuan, "Ṭantirah goal chance ṭha vawi hnih kan hlah a, hei bak hi chu team pahnih chance ṭha kan insiam tawh lo. Freekick hmanga an goal khung dan theih ni lo mah se an freekick hmuhna erawh ṭul lo taka kan player-te foul vang a ni a, final-ah chuan tih nawn chi a ni lo ang," tiin inkhel chungchang a sawi.

Chhinga Veng hian final-a an hmachhawn tur Siaha FC hi group stage-ah 1-0 in hneh tawh mah se football-ah result ngai a thleng nawn reng lo a, an inhnehtawk ngei tura ngaih a ni.

SEMIFINAL

Zotlang FC (CDFA) 1 - 2 Siaha FC

ZFC : Lalchhuanpuia 18'

SFC : MC Malsawmzuala 7'; A. Beihrokhai 27'

Chhinga Veng FC 2 - 2 New Serchhip FC

CVFC : Vanlallawma 42', 48'

NSFC : Henry Lalhruaitluanga 63', 67'

Penalty shootout-ah Chhinga Veng FC 4-3 in an chak