Serena hnehin Azarenka a champion

World number 1 Serena William-i'n season hmasa khan Grand Slam nomawi pathum chawiin hmeichhe tennis a awp hneh hle a, kuminah erawh Australian Open final-ah a chak loh hnuah Pathianni zan khan BNP Paribas Open final-ah world number 8 Victoria Azarenka a hneh lo leh ta.

Indian Wells-a inkhelah Azarenka hian American star Williams lakah darkar khat leh a chanve dawn an in-khelh hnuah 6-4, 6-4 a hnehna changin a champion. Belarus star hian kum 2012 khan he hmunah hian hlawhtlina a lo chang tawh bawk.

Fan-te lawm hlawh tak kum 26-a upa Azarenka chuan, "He hmuna champion nomawi ka chawi leh thei hi ka lawm a, khawvela ṭha ber ni mek ka hneh avangin ka lawmna a zual. Min ngainatu fans an tam em em a, anni hian phurna nasa tak min pein hnehna ka chan theih nan tha an thawh hlawk hle a ni," tiin a sawi.

Australian Open vawi hnih champion lo ni tawh Azarenka hian Williams lakah vawi li hnehna a channa chiah a ni a, hetih lai hian kum 34-a upa Williams hi vawi 17 zet a hneh lo tawh thung a ni.

A khingpui chungchang sawi chhunzawmin world number 1 hlu Azarenka chuan, "Serena nang hian mi tam tak tan entawn tur i hnutchhiah zel, i theihna sang tak leh tumruhna hi fak tlak a ni a, ka chhuang che. Hetiang kumah pawh ṭha taka ila khel thei hi a ropui, nang nena inhmachhawn hi chu ka tan hmasawnna leh chona thar a ni zel," a ti.