Champion lai Lorenzo chak nghal

Pathianni khan 2016 MotoGP tlan ṭan a ni a, Qatar Grand Prix-ah champion lai Jorge Lorenzo chuan hnehna a chang nghal a, Spanish rider hnungah hian Andrea Dovizioso leh Marc Marquez te an thleng.

World champion vawi thum lo ni tawh Lorenzo hian pole position aṭangin intlansiak bul ṭan mah se beisei anga a chet ṭhat nghal loh avangin Ducati duo Andrea Dovizioso leh Andrea Iannone ten an tlan pel nghal a. Amaherawhchu, Iannone hi lap ruknaah a chesual a, lap li chauh tlan tur a awm tawh tihah Italy rider Dovizioso tlan pelin hnehna a chang chhunzawm thei.

Kum 28-a upa Lorenzo chuan, "Warm-up lap-ah khan hard tyre ka hmang a, mahse ka rilru a nawm theih loh avangin soft tyre ah kan thlak. Kan elpui ber Rossi leh Marquez te khan hard tyre an hmang thung. A tawpah erawh a vannei zawkah ka ṭang ta a ni," tiin a bike ke thlan chungchangah a vanneih thu a sawi.

Movistar Yamaha tana kum hnih daih contract thar ziak hlim Rossi chuan podium a chang phak lo a, palina dinhmun a luah hram.

Kum 37-a upa Rossi hi kum 2013-a Ducati aṭanga Yamaha-ah a kir leh hnuah season hnih intlansiak leh tawhin World Championship-ah pahnihna dinhmun a luah leh ve ve a, kuminah pawh hian Lorenzo leh Marquez te nen hian an inel leh tura ngaih a ni.