Swiss Open champion Prannoy

Pathiannia 2016 Swiss Open Grand Prix Gold tournament final khelh zawh takah Indian Shuttler H. S. Prannoy chuan Marc Zwiebler hnehin champion nomawi a chawi.

Basel-a final khelhah Prannoy hian German shuttler Zwiebler lakah hian 21-18, 21-15 in hnehna a chang a, Indian shuttler langsar Saina Nehwal leh PV Sindhu te chet fuh lohna hmunah India badminton hming a ti ṭha a ni.

Rio Olympic-a inlan theih a beisei thu sawiin kum 23-a upa Prannoy chuan, "Swiss Open title ka lak avang hian world ranking-ah a sang 20 zingah ka tel thei dawn a, May thla hmain tournament dangah ka che fuh leh a nih chuan Rio Olympic-a inlan turin ka dinhmun a ṭha tawh ang, chumi tur chuan ka bei chunzawm dawn a ni," a ti.

World number 27 Prannoy hian kum 2014 khan Indonesia Masters Grand Prix Gold title a lo la ve tawh bawk. Indian shuttler hi nikum khan a che fuh vak lo a, June thla khan world number 12 ni mah se a ke zungṭang na vangin Denmark Open, Indian Open leh Singapore Open-ah te a inlan loh avangin a tla hniam hman hle a, tunah a dinhmun a rawn vawrh chho ve leh ta a ni.