Mission Veng-in Tuikual 'S' an au let dawn em?
Ngaihdan a inlang lo thei a, chutichung chuan Tuikual South-in 81-77 Mission Veng Vikings an hneh ṭum kha Mizoram Super League Season 2 league stage-a inkhel hmuhnawm bera chhal theih a ni. Ṭantu ngah pahnih inkhelah thawm a ring a, hun tawpah erawh Mission Veng leh anmahni ṭawiawmtu mipuiten Tuikual South-in 'Phengphehlep ṭial mawite' tih hla an sa lai chu ngaithla ṭhap.
Zanin dar 8:00 hian MSL2 semifinal hmasa ber chu Hawla Indoor Stadium, Republic Vengthlangah Mission Veng Vikings leh Tuikual South ten an khel ang. Semifinal hi 'best of three' hmanga chak zawk zawn tur a ni a, karleh Ningani khian an match hnihna khelh leh tur niin hetah hian chak zawk a la hriat theih loh a nih chuan April 7 zanah final lut tur zawk chinfel a ni ang.
Semifinal kalkawng
Tuikual South hian league round-a an match hmasa pathumah hnehna chang zawnin semifinal lut hmasa ber an ni. Mahse, Zarkawt Serpents leh Khatla TBL an hneh loh avangin match nga an khelh zawh hnuah erawh palina dinhmun an luah. Vikings erawh Tuikual South lakah hian 81-77 in chak lo mah se an khingpui dang an hneh vek a, Khatla TBL aiin head-to-head ah an chungnun zawk avangin table hmahruaitu an ni.
Thlirlawkna
MSL2-a tualchhung player hmuhnawm berte zinga mi chu power forward Vanchuangpuia a ni a, Armed Veng tlangval hian Vikings an hmachhawn hmasak ṭumin point 20 a score theih bakah rebound vawi riat zet a la thei bawk. Tuikual fa chuam F. Zodinthara chu a ṭhal na vangin a inlan theih dawn leh dawn loh a la chiang lo a, team captain Dina hi an match hnuhnung bera Tuikual South chak theihna chhan a ni.
Vikings hian Tuikual an hmachhawn hmasak ṭuma thawh hlawk ber Dishant V Shah (18 pts, 10 rb) chu Gujarat lama a haw thlak tawh avangin an chhawr thei dawn lo a, mah se guard Lalrina Renthlei leh tawnhriat nei ṭha Lalrinkima an la neih miau avangin an zam lo ang. Lalrina hian an league match hnuhnung bera Chaltlang Ryders an hneh ṭumin point 32 zet a score thei a, Tuikhuahtlang tlangval hi a chetfuh ṭum chuan Mizo player zinga hmuhnawm ber a ni.
Fans an phur
Vikings coach Reuben Lal-chhan-dama chuan, "Dishant V Shah kan la chah chho leh rih lo a, kan mamawh a nih chuan kan la chah chho leh ang. Kan player neih lai te hmang hian chak thei turin kan ṭha tawk," tiin Gujarat center tel loa an khelh tur thu a sawi.
Chanmari tlangval ChD-a chuan sawi chhunzawmin, "Veng mipui an phur a, zanin pawh hian kan ṭha hnem leh ang. Player-te an inlungrualin kan thawhona a
ṭha a, chak ngei kan inbeisei," tiin Vanglaini palai hnenah league round-a an hneh loh awm chhun lakah phuba lak an tum thu a sawi.
Tuikual South coach KC Lalliantluanga chuan, "Semifinal chinah chuan team ṭha vek kan ni tawh a, Dina chu a ṭhal na vangin a dinhmun chiang lo mah se midang an dam kim avangin beiseina kan nei sang," tiin Dina dinhmun a chian loh thu a sawi.
Veng mipui an phur thu sawi chhunzawmin KC-a chuan, "MSL khelh ṭan tirh aṭangin veng mipuiin min ṭawiawm ṭha thei em em a, zaniah pawh hian kan tam leh dawn a, anni zarah kan hneh leh theih kan inring," tiin Vanglaini palai a hrilh.