Toyota MPL10 Phase 2 an ṭan hnai

Mizoram chhunga football inelna sang ber Toyota MPL10 chu Santosh Trophy leh Mizoram inthlanpui vanga chawlh a nih hnuah November 16, Ningani aṭangin 1st Bn MAP Ground-ah khelh chhunzawm a ni dawn.

MFA thu chhuak aṭanga a lan danin MPL10 hi kumin chhunga zawh tum a ni a, chutihrualin ground allotment vangin nakkum lamah khelh zawh a ni chauh thei bawk. MPL10-ah hian match sarih khelh a ni tawh a, Chanmari FC chu hmahruaitu an ni mek.

Phase 1 khelh zawhah Chanmari FC, Chawnpui FC, Mizoram Police FC leh Aizawl FC te chu a sang palia awm chin an ni a, match 14 khelh zawha a sang palia awm chin hian semifinal an khel ang. Tun dinhmunah Mizoram team enkawltu Lalsangzuala Hmar kaihhruai Chhinga Veng FC chu semifinal khel thei chinah an awm lo a, phase 2-ah Chhingcows hi an tho chhuak thei ang em, tih hi tualchhung football ngainatute hriat châk a ni.

Round 8 ni khatnaah hian table-a a hnuai lam palite an inlan dawn a, an intum tawk khawp ang. Electric Veng FC-in semifinal an la beisei pha a, an khingpui tur FC Venghnuai tan erawh relegate lo turin point hmuh an mamawh hle. Chhinga Vengin Aizawl khaw pawn club Project Veng FC lakah fiahna an hmachhawn ang.

Aizawl FC erawh I League match vangin Chawnpui FC nena an inkhelh hun sawn hlat a ngai dawn. Mizo club hian nizan khan Neroca an hmachhawn a, November 17, Zirtawpni tlai dar 4:30 hian RG Stadium-ah Delhi FC nen I League match an khel ang.