Vawiin tlai dar 2:00-ah World Cup semifinal : India Vs New Zealand
India-in vawiin tlai dar 2:00 hian Mumbai-ah New Zealand an hmachhawn dawn a, Rohit Sharma hote hi inelna thlengtu niin Kane Williamson-a hote hi World Cup hnuhnung pahniha final lut thei an ni.
Men in Blue hian group match vawi kua khelhah hnehna an chang vek a, Black Caps ngei pawh hi an hneh zingah an tel. Mahse, semifinal-ah Rohit Sharma hote hian group stage-a an chet ṭhatna hi an keng tel thei dawn lo a, final khel tur a chiang ta lo.
Rinkai India
World Cup hnuhnung pathumah inelna thlengtu an champion vek a, tun ṭumah pawh hian inelna thlengtu India an che ṭha hle. Kum dangah chuan Men in Blue hian an batting ṭhatna chu an chhuang ṭhin a, tun ṭumah erawh batting chauh ni loin bowling lam pawh inchhuanna tham a tling.
Run siam tam ho thlir pawhin Virat Kohli chu a chung berah a awm vang a, captain Rohit Sharma pawh palinaah a awm pha. Shreyas Iyer pawh che ṭha 10 zingah a tel pha. Rohit-a kawppui Shubman Gill-a lan loh chhan hi inelna ṭantirh lam damlohna vanga a inlan loh vang a tih theih.
Top order an chet ṭhat avangin KL Rahul, Suryakumar Yadav leh Ravindra Jadeja ten bat-na hun an ngah lo a, inlanna hun an neihah an rintlak hlawm hle. Bowling lamah Jasprit Bumrah an hmachhuan a ni a, chutihrualin group stage-a New Zealand an hneh ṭuma wicket nga ngawt latu Mohammed Shami hming lam hmaih a thiang lo.
Beisei nei Black Caps
New Zealand hian semifinal-a lut India bakah Australia leh South Africa te an hneh lo vek. Mahse, group stage-a Men in Blue an hneh loh ṭum hian an chhuanvawr Kane Williamson a tel lo. Kum 2019 World Cup semifinal-a India-in Black Caps an hneh loh ṭum pawh khan Williamson hian 67 runs a siam a, hei aia pawimawh chu captain a nihna anga khelmual chhunga team a ho hi a ni.
Williamson-a telna New Zealand chu team dang daih an ni dawn a, tun World Cup hmang ṭha tak India thisen kai Rachin Ravindra leh tawnhriat nei ṭha Daryl Mitchell leh Devon Conway te hian inelna boruak sangah India bowler-te an chhaih buai thei viau bawk ang.
Black Caps bowler Lockie Ferguson leh Trent Boult te tan World Cup ṭha ber ni lo mah se India lakah insiamṭhatna hun a awm. Kut vei lama ball vawm vir chi Mitchell Santner hi a ṭangkai viau thei bawk. Santner hian WC semifinal-a India an hneh ṭum khan wicket hnih a la a, 34 runs chauh a pe (10-2-34-2), tun ṭum WC-ah pawh wicket khat chauh la mah se 37 runs chauh a pe (10-0-37-1) a ni.
