Silly Point : Fiahna Hapta

Nipui li liam ta khan, Kumpinu ramah ICC World Cup nghah a ni a, tahrik 9, Vawkhniakzawn thla 2019 khan, Manchester khuaa Old Trafford khelmualah khan India chu New Zealand lakah run 14-in an tlawm. Kha semifinal-ah khan an World Cup zinkawng chu an zawh tawp a nih kha.

History thlir ang

ICC Tournament an khelh hnuhnung palia India team knockout tu chu New Zealand vek hi an la ni a. Chutihrual chuan, ICC World Cup hnuhnung pathum a, New Zealand team vaw thla tu chu, a thlengtu ram zel an ni bawk. He record kal tluang lai pahnih zinga pakhat hi zanin hian a tawp ang.

Kiwis

ICC World Cup awm apianga thleng sang ber zinga mi, champion nomawi la hum thei chiah si lo team an ni a. World Cup hnuhnung berah khan India zin kawng kha semifinal-ah an tihtawpsak a, kumin hian ti nawn leh thei tak maw?

Mahse an tumpui India team hi khami ṭum aia ṭha zawk leh mahni tualzawla khel an ni tawh tlat! Hardik Pandya inhliam zar zo Mohammed Shami a form ṭhat vanglai tak ni bawk nen, tuna India team bowling attack hi, One Day International History a bowling attack ṭha berah mi ṭhahnem tak chuan an chhal hial. Mahse, chutah tak chuan New Zealand ho tan chance a awm ve thung. "Kan ṭhatna lai ber hi kan chetchhiatna leh chak lohna a ni fo," an tih kha maw.

Frontline bowler panga a khel India strategy-ah hian bowler pakhat hi Kiwis hian an target a ngai dawn a, chutah chuan batsman veikhawr pathum nei an nihna hmang tangkaiin, Ravindra Jadeja hi India bowling tight tak zinga runs putruhna awm theihna a ni ta a ni. League match lama over 10 a vawmna inkhela batman pakhat mah Jadeja hian a vawm hlum lohna awmchhun chu Kiwis nen an intum ṭum kha ni tlat.

India

Kiwis hian India team bowler panga tawpin an khel a, part time bowler nei lo aiin ball vawm thei an ngah zawk. Amaherawhchu, frontline bowler kan tih tak erawh pali chiah an nei thung.

Hetah tak hian Indian Batting line up tan chance ṭha a ni veleh thung. Chutihrual chuan tun World Cup a Kiwis ho thlen sanna chhan pakhat chu an part time spinner Glenn Phillips leh Rachin Ravindra te, strike bowler ang maia ball an vawm ṭha thei lutuk hi a ni tlat thung. He mite pahnih hnenah hian, "Part Time mai mai in nih kha," a tia, tun World Cup a an chet ṭhatna thai chhe vek thei tur erawh chuan, Indian batting line up baka duhthusam erawh an awm chuang lo.

Tichuan!

Tun World Cup-a India team kaltluanna hnar pakhat ber chu captain Rohit Sharma-a'n hma a hruai a, bul ṭan satliah pawh ni lo, bowlers tam tak beidawnna tur khawpa silai satliah mai ni lo, laipui leh machine gun hmang kawp ang maia hmelma te a rawn tlir nghal ṭhin hi a ni.

Chutah tak chuan Virat Kohli hi, pressure awm miah loin tun World Cup chhung hian a la inkhelh theih phah a. Kiwis tan ball thar vawm che thiam ṭhian dun pahnih Trent Boult leh Tim Southee ten 'an game ṭha ber' an phochhuah a ngai ngei ang. Indian bowler-ten Kiwis batting line up top 7 a veikhawr pali lai intlarna hi, an pace bowler ten an ṭhiah vat loh chuan, vei vawm spinner pahnih Jadeja leh Kuldeep te tan a harsa lehzual dawn tih a chiang bawk.

Lung min lentu Wankhede

Thil pakhat a chiang, Mumbai hi thlasik thim hlim daiin a tibuai ve lem lo a, he khelmual zau lem lo takah hian, chawhnu hera vuak hmasak zawk hi ṭhumvawra vannei zawk zawk captain chuan an thlang ngei ang.

Tin, tun World Cup ah hian thim hlim dai a awm loh a leiah, khelmual ṭhenawm chiah Arabian tuipui tlai lam thli inthlak chuan, stadium light an han êng chiah hian, ball thar vawm te tan swing a tam bik tih chu League stage-a Wankhede Stadium-a inkhel zawng zawngah khan a chiang mai awm e.

Semi Final chibai vek u.