Zverev lakah Alcaraz chak lo

ATP Finals 2023 an khel mek a, a ṭha hlang intum an nih avangin result tur sawi lawk a harsa - world number 2 Carlos Alcaraz chuan a match hmasa berah Alexander Zverev a hneh lo nghal phawt.

Thawhṭanni zan inkhelah Wimbledon champion Alcaraz hian set hmasa ber chu tie break an khelh hnuah a la mai. Mahse, 2018 leh 2021 ATP Finals champion Zverev hi a tawpah chuan 6-7 (3-7), 6-3, 6-4 in a chak.

Tun hnaiah Alcaraz a khel ṭha tawk lo, a match hnuhnung pathumah a chak lo vek; a zawna match thum a chak lohna hnuhnung zawk chu kum 2021 March thla kha niin, hetih lai chuan world ranking-ah a sang zual 100 zingah a la tel phak lo.

Spanish tlangval hi season hmasa pawh khan ATP Finals khel turin a tling tawh a, mahse hliam vangin a inlan thei lo. Kumin hi a inlan vawi khatna niin, a bul ṭan dan a duhawm lo hle - group match chauh a la nih avangin beisei erawh a la nei thei.

Hnehna changtu Zverev erawh a thiam zual pariat inelnaah hian a khel thei viau, vawi hnih a champion tawh miau avangin tun ṭumah hian seeded pasarihna, a hniam ber dawt ni mah se dah hniam theih a ni lo.

Kum 26 mi Zverev chuan, "Ka service-in min chhanhim niah ka ngai, game hmasa bera break point ka inchhanhim thei hram a, set hnihnaah service min chhuhsak tur chu ka lalet thei hram bawk.

"World number 2 lakah set ka hloh hmasa a, chumi hnuah ka tho chhuak leh a nih chuan ka khel ṭha hleah ka ngai," a ti. A kerek vanga harsatna a neih tawh loh thu a sawi tel bawk a ni.

German tlangval hi season hmasa French Open semifinal an khelh laiin a kerek a hliam a, hun rei tak a chawlh hnuah lo kir lehin ṭha takin tennis a khel thei tawh, tun ṭumah pawh hian hmachhawn châkawm lo zinga mi a ni ang.

Red Group inkhel dangah Daniil Medvedev chuan Andrey Rublev chu 6-4, 6-2 a hnehin inelna bul a ṭan ṭha hle. Ṭhian dun inkawm ngeih tak ni mah se khelmual chhungah chuan chungnung zawk an awm a ngai a ni.

Season hmasa khan Turin khawpuiah hian Medvedev hi a che fuh lo hle a, group match pathumah a chak lo vek - kuminah erawh thawnthu a danglam dawn ta niin a lang, a hmabak chu Zverev a ni dawn.

Russian tlangval Medvedev chuan, "Set khatna kha a harsa khawp mai, tihsual neih loh ngawr ngawr kha ka tum a, a vannei zawkah ka ṭang," a ti a, a elpui dangte anga tharum ngah ve deuh a châk thu a sawi bawk.

Medvedev hi hard court-a inkhel thiam bik a ni - US Open nomawi pawh a chawi tawh a, chutihrualin a elpui player ṭha dangte angin major tournament-ah a che na tawk lo deuh ṭhin.

ATP Finals hi ranking sang zual pariatte inelna a ni a, group pahnihah ṭhen hran an ni. Group pakhata awmte an inkhel kual vek dawn a, chumi hnuah a sang zual pahnihten semifinal an khel ang - semifinal aṭang chuan knockout a ni.