Sir Bobby Charlton kan thlah liam ta

Manchester United legend Sir Bobby Charlton chu nimin khan thlah liam a ni ta a, October 21-a thi Sir Bobby hi nimin khan Manchester khawpuiah vui a ni a, England leh United rohlu chu khawvelah hmuh leh ni ngai tawh lo turin thlah liam a ni ta.

Mipui 1,000 chuangin Sir Bobby thlahna hun hi an hmang a, he hunah hian football khawvela hming langsar tak tak an kal nual. Manchester United manager ropui Sir Alex Ferguson chu Bobby thlahtu zingah a tel a, United tana khel ṭhin Paul Scholes, Ryan Giggs, Roy Keane, Steve Bruce, Paddy Crerand leh Andy Cole te pawh hmuh tur an awm.

United tana khel mek zingah Harry Maguire leh Luke Shaw ten Sir Bobby an thlah a, United player leh manager hlui Ole Gunnar Solskjaer leh England manager Gareth Southgate te pawhin English football-a mi ropui bik hi an thlah.

Prince of Wales, English football thuneitu sang ber Football Association-a President ni bawk Prince William chu Sir Bobby thlahtu zingah a tel a, an ram rohlu chu ui tak chungin an thlah liam a ni.

Mangṭha legend

Manchester United tana a vanglai hun zawng zawng hmang zotu Bobby Charlton hian Red Devils tan match 758 khelin goal 249 a khungsak a, league nomawi pathum bakah FA Cup, FA Charity Shield leh European Cup vawi khat ṭheuh a chawipui.

Hei vang hian nimin lama vuinaah pawh Manchester Cathedral-a a ruang phur luh a nih hmain Old Trafford paltlanga kalpui a ni a, hetah hian fans tam takin an lo thlah. United khelmuala East Stand lam paltlang pui niin, 'Holy Trinity' tia hming lem an pek ṭhin Sir Bobby, George Best leh Denis Law te lim an hunna chu paltlang pui a ni.

He lim bulah hian United Under-18 leh Under-21 te chuan guard of honour nen zahna an lo lantir a, Old Trafford pawn lamah chuan black & white-in Charlton-a'n United tana a vanglai hun a hmanna leh club Director a nih hnu thlalak thlengin pholan a ni.

Sir Bobby hian England tan match 106 khelin goal 49 ngawt a khungsak a, kum 1966 khan World Cup-ah England chu champion nomawi chawipuiin Golden Ball a dawng hial a, hemi kum vek hian Ballon d'Or a dawng bawk - Ballon d'Or-ah hian 1967 leh 1968-ah pahnihna a ni bawk.

An thlah ta

Manchester United chief executive hlui David Gill chuan Charlton thlahna thu a chhiar hmasa ber a, Gill chuan, "Legend, mi ropui, kan ngainat em em leh mi rinawm, hnathawhpui nuam kan tih em em kha a ni. Football hi a tuimite chauhin an ngaihven a ni mai thei a, Bobby erawh khawvel huapa ngaihsan rawn a ni.

"English game-a thil ṭha zawng zawng hi a hming nen a inzawm vek a ni," a ti a, a dah sang hle. Charlton-a tupa William Balderston chuan, "Mi thil thiam bik, thawnthu sawi thiam tak a ni," a ti a, Charlton leh a nupui Norma chuan, "Inpekna awmzia a takin min hmuhtir a ni," a ti bawk.

Sir Bobby thlahna hi Rev. Canon Nigel Ashworth chuan kaihruaiin, Abide with Me, Brother James' Air leh Jerusalem tih hlate chu amah thlah nan sak a ni a, opera singer Russell Watson chuan 'How Great Thou Art' tih hla hmangin a thlah thung.

Kum 1981-a United player man to ber ni tura Old Trafford pantu Bryan Robson chuan, "Player ropui tak a ni mai lo a, mi ropui tak a ni tel. Mi zawng zawng tan hun a nei a, puih ngai chu puih zel a duh a ni," tiin player ropui Sir Bobby Charlton chu a thlah.