Japan Masters-ah India tlangvalte

India tlangval badminton khel thiamte chu Japan Masters lamah an inlan dawn, tournament nomawi chawi a pawimawh tluk zetin Paris Olympic khel tura zinkawng a nih tel bawk avangin a pawimawh zual hle.

Hliam vanga Denmark Open leh French Open khel thei lo H S Prannoy a dam tawh. Thla hmasa lawka Asian Games bronze medal latu Prannoy chuan, "Asian Games khelh lai ai khan ka dinhmun a ṭha tawh zawk.

"Chutihrualin vawi leh khata ṭhat leh nghal hluai erawh a harsa dawn, zawimuanga insiamrem a ngai dawn a ni," a ti a, hliam dam hlim ni mah se tournament khel tura a inpeih thu a sawi bawk a ni.

Indian shuttler dang Lakshya Sen leh Kidambi Srikanth te pawh an tel dawn, anni pahnih pawh hi Paris Olympic khelh tum an ni a, an tan a pawimawh zual dawn hle.

Kumin May thla tir aṭanga nakkum April 28 inkara an khelh dan, an ranking point aṭangin Paris Olympic khel tur hi thlan an ni dawn a, ranking sang zual 16 te chu infiamna khawmpui lian berah hian an tel thei dawn a ni.