England squad-ah Palmer, Konsa leh Lewis koh belh

England squad aṭanga James Maddison, Callum Wilson leh Lewis Dunk te an inhnuhdawh avangin Gareth Southgate chuan an aiawh turin Cole Palmer, Ezri Konsa leh Rico Lewis te a ko.

Three Lions hi Euro 2024 khel turin an tling tawh a, Malta leh North Macedonia an hmachhawn tur hi chu Southgate-a tan Germany-a hruai tur thlanna a ni ber tawh ang.

Chelsea forward Palmer leh Manchester City defender Lewis te hi England U21 team aṭangin senior team-ah sawn chhoh an ni a, theihna nei sang tak an nih ve ve avangin Euro 2024-ah meuh chuan an rintlak viau thei bawk.

England-in kumin June-July thlaa Euro U21 C'ship an champion khan Palmer hi player pawimawh a ni pha a, kum 18 mi Rico Lewis erawh a la naupan deuh avangin squad-ah an telh ta lo.

Kum 21 mi Palmer hian nipui bazarah Man City aṭangin Chelsea a zawm a, London club hian goal li khung tawhin a club hlui Man City laka injury time-a a goal khung vangin a hming ṭhat phah hle.

Rico Lewis erawh Man City squad tichhahtu chauh a la ni a, chutihrualin kum 18 mi lek ni chungin City tan inelna hrang hrangah match 35 a khel tling tawh.

Aston Villa centre back Ezri Konsa erawh kum 26 mi a ni tawh a, Unai Emery hnuaia an chet ṭhat avangin Southgate-a'n a ko. Konsa hi FIFA U-20 World Cup 2017-a England champion puitu zinga mi a ni a, senior team-ah erawh vawi khat mah a la inlan lo thung.