Neymar dinhmun a ṭha

Brazilian forward Neymar chu a khup hliam zai a ni a, amah enkawltu Rodrigo Lasmar chuan a dinhmun a ṭhat thu a sawi a, mahse engtik hunah nge a inkhelh leh theih dawn tih erawh a sawi thei lo.

Kum 31 mi Neymar hian thla hmasa khan Brazil tan 2026 World Cup qualifier a khel a, a khup a hliam. A khup vei lam hliam ang hi thla riat aṭanga thla 10 laite an chawlh a ngai ṭhin.

Dr Lasmar chuan, "A tir aṭangin enkawlna ṭha tak a dawng a, kan thurawn leh tih tur angte ṭha takin a zawm. Enkawl chhunzawmna a mamawh tur ang pawh ṭha taka ruahman niin Neymar hi a rang thei ang bera a lo kir kan beisei," a ti.

Neymar hian nipui bazar lai khan Paris Saint Germain aṭangin Al-Hilal a zawm. A tirah tihrawl na vangin a inkhel thei lo tawh bawk - Saudi Arabian club tan hian match vawi nga chauh a la khel.

An ram Brazil pawhin Neymar tel loin World Cup qualifying an khelh a ngai dawn. World champion vawi nga ni tawh Brazil hian November 17, Zirtawpni zingah Colombia an lenchilh ang, chumi hnuah Argentina nen an intawng leh dawn a ni.