Football tana ṭha turin thutlukna ka siam - Osimhen

Napoli striker Victor Osimhen chuan nipui bazar lai khan Saudi Arabian club aṭangin sawmna duhawm leh hnawl harsa tak a dawng tih a sawi a, mahse a tawpah chuan a football zinkawng atana ṭha turin thutlukna a siam tih a sawi.

Nigeria international hian season hmasa khan inelna hrang hrangah goal 31 a khung a, a club Napoli chu Serie A champion a nihpui - Saudi club chauh ni loin European club dangte pawhin an hnena khel turin an duh.

Amah sawmtu club zingah Al Hilal an langsar ber. Neymar leh Wolves captain Ruben Neves te pawh latu hian Osimhen lei nan pound maktaduai 173 lai sen an huam a, a hlawh atan pawh sum tam tawk tak pek an inhuam bawk.

Osimhen chuan, "Ka duh loh thu ka sawi khan pawisa an tipung nasa zel a, club leh ka aiawhte nen pawh kan sawi khawm, lawm taka lo dawnsawn mai kha thil châkawm tak chu a ni chiang mai.

"Mahse, engkim mai kha Pathian kutah ka dah a, ka football zinkawng atana ṭha ber tura ka ngaih angin thutlukna ka siam, sum aia football dah pawimawh hmasak ka duh a ni," a ti.

Kum 24 mi Osimhen hi season hmasa khan European League lian hoah goal khung tam lama pangana a ni. Premier League club zingah pawh Manchester United leh Chelsea te nen an sawizawm hman.

Naupan lai aṭanga EPL a en ṭhin thu sawi zuiin Osimhen chuan, "Ka naupan laiin Premier League ka en ṭhin, mahse club mal ṭan tak erawh ka nei hran lem lo. Ka nuin jersey pahnih erawh chu min leisak.

"Manchester United leh Chelsea jersey ka nei, pakhat chu Vodafone tih inziahna kha a ni. Ka ṭhiante hian English club lian pahnih hi an ṭan hle, kan ramah chuan EPL kan en nasa a ni," a ti.

Nigerian striker Osimhen hian Blues legend Didier Drogba chu a footballer ngaihsan berte zinga mi a nih thu a sawi a, a khelh dan aṭangin thil tam tak a la zir reng ṭhin tih a sawi bawk.