Ni 50 hnuah Toyota MPL10 : Electric Veng Vs FC Venghnuai; Chhinga Veng Vs Project

Toyota MPL10 chu Santosh Trophy leh Mizoram inthlanpui vangin chawlh a ni a, ni 50 hnuah 1st Bn MAP Ground-ah khelh ṭan a ni leh dawn ta. Vawiin chawhma dar 11:00 hian Electric Veng leh Venghnuai te an inkhel ang a, tlai dar 2:00-ah Chhinga Veng FC leh Project Veng FC te an inkhel ang.

Vawiina inlan tur team pali hi a hnuai lam pali an ni a, Santosh Trophy-ah Electric Veng, Project Veng leh FC Venghnuai ten player an thawh lo. Chhinga Veng FC-in player pakua an thawh a, Chhingcows enkawltu Lalsangzuala Hmar-in Mizoram team a hruai. Tualchhung football ngainatuten chik takin Chhinga Veng team khelh dan an thlir dawn a, team dang nen an danglamna an en tel ang.

Beisei nei EFC

Electric Veng FC-in semifinal luh beiseina an nei a, chumi tur chuan vawiina FC Venghnuai hi an hneh hi a pawimawh. Venghnuai tan erawh semifinal beisei aiin relegate lo tura point khat tal pawh sual chhuah a ṭul tawh thung.

September 13, Nilainia team pahnih intawn hmasak ṭum khan Electric Vengin 3-1 in hnehna an chang a, EFC striker C. Lalhriatpuia'n goal hnih khungin man of the match-ah thlan a ni. C. Hriata hian MPL10-ah goal thum a khung tawh a, season ṭha tak hmang mah se Venghnuai defender C. Ramdinmawia nen an goal khung zat a inang chiah.

Mizoram striker ṭha zinga chhiar tel turin C. Hriata hian goal tam zawk khung a mamawh a, Venghnuai lakah a theihna lantir a ṭul dawn. Venghnuai hian goal khungtu bik an nei lo a, Ramdina'n match hmasa bera hattrick a siam hnuah a khung tawh lo. T. Vanlalruata, Eric Remruatpuia Chhangte, Jerry Lalchhanchhuaha leh RM Zothansanga ten goal khat ṭheuh an khung tawh a, Phase 2-a chet ṭhat an duh a nih chuan tlarhma lamah mawhphurhna la ngam an awm a ngai ang.

Hei le, Chhinga Veng

MPL history-a record nei ṭha ber coach Sanga enkawl Chhinga Veng hian khelmual pawna harsatna an tawh vangin khelmual chhungah an buai phah a, match hmasa berah registration fel loh vangin Mizoram Police lakah point an hloh nghal.

Khelmual pawna buaina an neih avang hian I Day Football champion Chhingcows hian phase 1-ah beisei ang result an nei lo a, phase 2 ṭan hmain training an nei ṭha tawk lo bawk. Mahse, Chhingcows hian Mizoram team-ah player pakua an thawh a, hei hi an ṭhatpui tho tura ngaih a ni.

Project Veng nena an inkhelh ṭum khan Chhinga Veng hi a vannei zawkah an ṭang a, si phurh suttu zawk niin point khat hlu tak an hlawh chhuak. An inkhelh tawhna result avangin Project Vengin Chhingcows hi an hlau dawn lo a, hei bakah hian Mizoram team-a player an thawh loh hi an ṭhatpui thei bawk. Training hmun nei ṭha Kolasib club hian phase 2-ah an training neih ṭhat lantir an tum ang.