Mizoram club 3-1 Manipur club

I League-ah Thawhlehni zan khan NorthEast Derby khelh a ni a, Mizo club Aizawl FC-in an khingpui Manipur club Neroca chu 3-1 in an hneh. Neroca hian goal khung hmasa mah se MPL10-a top scorer ni mek Lalrinzuala'n AFC tan hattrick a siam a, Mizo club-in an lehthal.

Aizawl FC hian match zawnin hnehna an chang a; November 17, Zirtawpni tlai dar 4:00 hian RG Stadium-a grass phah tharah Delhi FC an hmachhawn dawn. Mizo club-in result ṭha an neih nan Mizo mipui ṭawiawmna ṭha an mamawh ang.

Beisei pha lo

Aizawl FC-in khualmualah team ṭha Sreenidi Deecan an hneh avangin inrintawkna nasa tak an nei a, Kolkata pawh hi point thum hmuh beiseiin an pan. Mahse, Neroca zawkin inkhel bul an ṭan ṭha a, Manipur club an khel ṭha zawk.

Aizawl FC-in ball awmze nei an inpe thei lo a, an goal bawh a na thei lo. Tlarhnung lam ball an inpe fimkhur lo a, Neroca lamin chance an neih phah bawk. Minute 33-naa Neroca midfielder Tarak Hembram goal khung pawh AFC player chetsual vangah a ngaih theih.

AFC midfielder Lalramsanga ball pek uluk tawk lo chu Nonganba Singh Akoijam-a'n a chang a, Neroca-in mawi taka ball inpe kualin Mizo club tlarhnung an ṭhiat. Mizo defender Lalmuanawma (Munez) dinna a dik tawk lo a, Tarak Hembram-a'n petna hun neih phahin a ball pet hi duhthusam ni lo mah se keeper Nora Fernandes-a'n a hna a thawk ṭha tawk lo.

Goal luh hnuah pawh Neroca an che ṭha zawk a, Mizo club an talbuai. First half injury time-ah K. Lalrinfela a insum zo lo a, VAR awm loh a vanneihpui. Mafela hian a pet Surajit Seal nen yellow card an hmu ve ve.

A danglam ta

Coach B. Malsawm-zuala'n thutlukna huaisen a siam a, first half-a goal an chhuahna kawnga mawhphurtu Ramsanga leh Munez te aiah Sheikh Sahil leh captain Lalchhawnkima te a luhtir. Mohun Bagan midfielder hlui Sahil-a luh hnuah AFC game-in awmzia a nei a, inkhel a nung sawt.

Mual dinglam sirah R. Lalthanmawia a hlauhawm nghal a, minute 62-naah Rinzuala hmangin si phurh an sut. Laldanmawia'n dinglam aṭanga cross lutin keeper Soram Porei hnek hmain Mafela'n a tauh hman. Ball per hi Rinzuala'n goal-ah pet nghal a, 1-1 a ni.

Coach Sawmtea'n substitution awmze nei a siam leh a, bench aṭangin midfielder Lalthankhuma leh winger Lalbiakdika te a luhtir. TK-a hian Amawia freekick pet ṭhat a ti goal teuh hle. Mizo club goal bawh a na a, team ṭha zawk an ni tawh.

Minute 81-naah wing back Danmawia'n huaisen takin box chhungah ball a khalh lut a, a shot/cross chu Rinzuala'n goal-ah a chantir. Injury time-ah substitute BD-a a rawn inlar a, penalty a rawn sual chhuak. Rinzuala'n penalty hi hattrick siam nan a hmang a, Aizawl FC 3-1 in an chak.

Coach kam chhuak

AFC coach B. Malsawmzuala chuan, "Coaching staff te kan thawh hona a ṭha a, player-ten thu an awih. Hetiang anga kan thawh hona a ṭhat zel chuan beisei a sang khawp mai. Ka chunga rinna nghat ngamtu Sporting Director chungah ka lawm takzet bawk, " tiin Vanglaini a hrilh.

Sporting director Hmingthansanga pawhin coaching staff leh player-te hnathawha a lawm thu a sawi bawk. Coach Sawmtea hian I League club match hnih a enkawlah a chak ve ve a, Delhi FC an hmachhawn hunah a enkawl dawn em, tih a chiang lo thung.

Mizo club hian nimin khan Aizawl an rawn thleng a, vawiinah training an nei ang a, naktukah I League match an khel lehnghal dawn. AFC-in coach thar an nei a nih pawhin team kaihhruaina hun ṭha a nei dawn lo a, hei vang hian Mizo mipui hma ngeiah Mizo club hi Mizo coach-in a la enkawl a rinawm.