Argentina hmaah Suarez awmna Uruguay

Lionel Messi inkhel en chaka khawhar mekte tan lawmna tur hun a thleng leh dawn ta - Zirtawpni zing dar 5:30 hian Argentina leh Uruguay te chuan World Cup qualifier an khel dawn; Messi leh Luis Suarez inhmachhawn tur hi a hmuhnawm ang.

Inter Miami tan season chawlh lai a nih avangin tun hnaiah Messi a inkhel ngai lo, Argentina captain hian training erawh a nei reng tho. Suarez pawh Qatar World Cup hnua a vawi khat nan koh a ni leh chiah.

South America aṭangin Suarez hi World Cup qualifier bika goal khung hnem ber (29 goals) a ni ṭhin, mahse tun hnai khan Messi chuan goal hnihin a rawn khum - player thiam bik pahnih hi record chelhtu zawk nih tumin an la inum chhunzawm dawn.

Argentina inpeih

Lionel Scaloni-a enkawl Argentina hi an danglam a, nuam ti takin an inkhel ṭhin. Coach Scaloni hnuaiah hian club lama che ṭha vak lo pawh ram tan chuan an khel ṭha em em zel, team boruak ṭhain a khen tel a nih avangin a mak hran lo.

Captain Messi chuan, "Argentina tana inlan dawn hi chuan ka hlim reng ṭhin," tiin a sawi a, hei hian an team boruak awm dan tur a sawi thui viau bawk. An match hnuhnung 14-ah an tlawm lo a ni satliah lo, an chak fai vek.

Match 14 chhung hian goal 34 an khung a, nikum December thlaa World Cup final-a France laka goal an chhuah hnuah an la chhuah leh lo, a zawnin match riat chhung goal chhuah loin an kaltluang tawh tihna a ni a, tawpsan mai an tum lo ang.

Ram pahnih bik an intawn hnuhnung pasarihah pawh La Albiceleste hi an tlawm miah lo, tun ṭumah pawh hian rinkai zawk an ni ang. Messi thlawp turin Julian Alvarez, Paulo Dybala leh Angel di Maria te an nei - Uruguay tlarhnung tan fimkhur a ngai dawn.

Suarez an ko

Uruguay hian European club liante duh rawn an nei, a hming chu Federico Valverde a ni. Real Madrid midfielder hian ram tana Suarez an ko leh ta chu lawmawm a tih thu sawiin, "Kan ram mite chuan ani hi kan ngaisang em em a, a lo kir hian boruak pawh a siam ṭha lehzual ang," a ti.

Kum 36 mi Suarez hi a vanglai a pel tawh a, football inelna sang leh hautak ber berah a inlan tawh lo. Mahse, goal khung erawh a la thiam reng tho - Brazilian league kal laiah goal 14 khung tawhin a khung tam ber hial.

An khingpui tur Argentina captain Messi chungchang sawi zuiin Valverde chuan, "Kan inhmachhawn tawh ṭhin a, lo danchah dan tur ka hre lo. Ani hi chu khawvela a ṭha berte zinga mi a ni," tiin a dahsang thiam hle a, dan theih ngei erawh a tum ruh khawp ang.

Uruguay hian Liverpool strker Darwin Nunez an nei bawk a, ani hi Suarez leh Edinson Cavani te awm loh lai pawhin an ram innghahna a ni - tun ṭumah pawh hian Reds hmatawng hi Argentina tlarhnung tibuai thei ber tura ngaih a ni.

Argentina Squad:

Goalkeepers: Juan Musso (Atalanta), Emiliano Martinez (Aston Villa), Walter Benitez (PSV Eindhoven) and Franco Armani (River Plate).

Defenders: Gonzalo Montiel (Nottingham Forest), Pablo Maffeo (Mallorca), Nahuel Molina (Atletico Madrid), German Pezzella (Real Betis), Cristian Romero (Tottenham Hotspur), Lucas Martinez Quarta (Fiorentina), Nicolas Otamendi (Benfica), Marcos Acuna (Sevilla), Francisco Ortega (Olympiakos), Nicolas Tagliafico (Olympique Lyon).

Midfielders: Leandro Paredes (AS Roma), Rodrigo De Paul (Atletico Madrid), Guido Rodriguez (Real Betis), Enzo Fernandez (Chelsea), Exequiel Palacios (Bayern Leverkusen), Giovani Lo Celso (Tottenham Hotspur), Alexis Mac Allister (Liverpool).

Forwards: Paulo Dybala (AS Roma), Angel Di Maria (Benfica), Lionel Messi (Inter Miami), Julian Alvarez (Manchester City), Lautaro Martinez (Inter Milan), Nicolas Gonzalez (Fiorentina), Lucas Ocampos (Sevilla).