Mizo pathum awmna India vawiinah inkhel dawn

International break hman a ni a, India pawh an awm mai mai bik lo - World Cup qualifier khel turin Kuwait an pan a, zanin dar 10:00 hian an inkhel dawn.

Blue Tigers squad-ah hian tun hnaia koh a nih loh avanga sawi hlawh tak Lalengmawia Ralte (Apuia) chu koh a ni leh ta a, ani bakah hian Lallianzuala Chhangte leh Lalchungnunga te chu India squad-ah hian an awm bawk.

Tuna India inlanna tur hi second round tih a ni a, group A-ah Blue Tigers hian Kuwait, Qatar leh Afghanistan an awmpui a, chuvangin zaninah chaka bul ṭan a ṭul - group tin aṭangin a sang pahnih chu qualifier third round khel turin an tling dawn.

Blue Tigers hian November 21 zanah Qatar an mikhual zui leh dawn a, a tawi zawnga sawi chuan an group-a team ṭha pahnih a tirah an tum dawn a, inrintawkna nei turin Kuwait khelmualah hnehna an chan a ṭul.

Thawnthu hlui

India leh Kuwait hi vawi nga an lo intawng tawh a, heng an intawn pangaah hian vawi hnih ve ve hnehna changin, vawi khat an inhnehtawk thung - Blue Tigers chak pakhat zawk hi penalty-ah a ni a, SAFF Championship final kha a ni.

Kum 1978 khan team pahnih hi a vawi khat nan an intawng a, Asian Games-ah 6-1 ngawtin Kuwait an chak. November 2004 khan friendly match-ah intawngin, India hi 3-2 in an chak mial a, India tana goal khung zingah Jerry Zirsanga a tel nghe nghe.

Jerry hi hetihlai hian kum 16 leh ni 311 mi niin, India tana goal khung thei naupang ber record a siam. November 2010 khan Bob Houghton-a'n India a enkawl laiin Kuwait hian friendly match-ah India hi 9-1 zetin an sawp!

Mahse, kumina SAFF Championship-ah India-in Kuwait tawng lehin, an intluk tawk viau. Match hmasa zawkah 1-1 in an inhnehtawk a, match hnihnaah final-ah intawngin, 1-1 bawkin an khar. Mahse, penalty-ah 5-4 in Blue Tigers an chak zui.

Kuwait an ṭha?

FIFA ranking-a an tawnsan lai bera 24-na (1998) ni thei Kuwait hi tun hnaiah an tlahniam a, FIFA ranking-a an dinhmun pawh 136-na a ni mek - 102-na ni mek India an tluk lohna hi a sang viau a, chutihrual chuan kuminah team nem aia team lian an tum nasat zawk avangin ranking aṭanga teh chi an ni lo.

Kuwait hian an match hnuhnung berah pawh Asia team ṭha zinga mi Syria chu 2-1 in an hneh a, kumina an hneh zingah team ṭha United Arab Emirates (1-0), Zambia (3-0) leh Bahrain (3-1) te an tel a, mahni muala India laka tlawm chu an tum hauh lo ang.

Portuguese coach Rui Bento enkawl team tan striker Shabaib Al-Khaldi chu tlarhmaah innghahna a ni dawn a, UAE club Hatta Club tana khel hi India tlarhnung tana buaina thlen turin a ṭha tawk.

Captain Fahad Al Hajeri-a'n tlarhnungah Lianzuala leh a ṭhiante dan tumin theihtawp a chhuah leh dawn a, kum 32 mi defender hi 6ft 1in a sang a ni a, ram tan vawi 70 ngawt a inlan tawh - a tawnhriat ringawt pawh a ṭangkai ang.

Fimkhur a ngai

India forward Lianzuala chuan, "World Cup qualifier a nih tawh hi chuan a dan a dang ṭhin a, Kuwait pawh tun hnai vawi hnih kan inkhelah tithei viau mah ila, an khelmualah an inlan dawn avangin a harsa tawh ang.

"A hma aiin an squad pawh a ṭha ang tih ka chiang a, chutihrual chuan kan point hmuh ve theihna game niin ka hria. A tir aṭanga a tawp thlengin tha thlah hauh loa kan khelh a ṭul dawn a ni," tiin Vanglaini a hrilh.

Lianzuala hi India tan bul ṭan tura beisei a ni a, tlarhma laiah Sunil Chhetri awmin, Mahesh Singh nen an thlawp thei ang. Midfield-ah Apuia, Anirudh Thapa leh Sahal Abdul Samad an awm tura ngaih a ni a, Gurpreet Singh Sandhu chu si ban nghak tura beisei a ni.

Tlarhnung laiah Anwar Ali a awm loh avangin Sandesh Jhingan-a kawppui tur rinthiam a harsa a, Chungnunga'n chance a nei lo ang, tih a sawi theih loh. Mual sirah Akash Mishra chu bul ṭan chiang tura ngaih a ni a, Subhasish Bose tan chance a awm thei bawk.