Silly Point : RAIN RAIN GO AWAY

Bay of Bengal tuipuia ruah inmung mek chuan vawin tlai Eden Gardens, Kolkata a semifinal pahnihna inkhel tur hi a tibuai thei a. Tin, khaw chinin a tarlan danin , reserve day atana an dah Zirtawpni hlei hlei hi Kolkata khawpuiah chuan ruah a sur nasat beisei a ni .

Chutianga khelmual chhunga chinfel theihloh a nih chuan, ICC dan dinglai angin, League stage a net run rate ṭha zawk South Africa team zawk chu thlan tui far miah loin, Ahmedabad khawpuiah tun Pathianni hian final an khel ang.

Tun hnai leh tun hma

Chawlkar li liam ta tahrik 12 Khuangchawi thla khan, Ekana Stadium , Lucknow-ah league stage-ah South Africa hian Australia an sawp a nih kha. Mahse, khata ṭang khan tui litre engmawzat hi Tlawng luiah khuan a lo luang leh hman tawh a, Australia team pawh insiamṭhain, san lam an pan telh telh kan ti thei ang.

Proteas leh Aussies World Cup History sawi dawn hi chuan, 1999 World Cup, Headingley, Leeds-a an intum ṭuma, khawvela fielder ṭha ber pawl Herschelle Gibbs-a'n Australia captain ball vuak a lo man zet tawh, lawm lutuk vawr chhoh tum thlauh leh ta si, khata Steve Waugh-a'n, "Ṭhianpa, World Cup i thlauh tlat mai," tih ṭawngkam hmanga a chhanletna kha thai lan loh theih a ni lo. Australia an champion zui ta reng a, Kum 10 chhung chu Khawvel cricket an awp zui ta bawk a nih kha.

Proteas

World Cup lo inherchhuah apianga champion tura rinkai, beisei pha ngai lo leh irhfiak ching South Africa tan an Southern Hemisphere hmelma kumhlun Australia hi league stage a an lo hneh tawhna dah ṭhain, tha thar an thawh a ngai ngei ang a. An innghahna Quinton de Kock-a'n a game ṭha ber a khelh a ngai dawn tih a chiang. South Africa team nena inhmeh lo tak chu tun ṭum hian an bowling department-te hi an ṭhat loh ber ṭum? tiin a chhal theih ang a, chumi veng tur erawh chuan an batting department-te an form a ṭha a, league stage inkhel ṭum nga zetah run 300 chuang an vaw chhuak thuak. Khawvela pace attack ṭha ber zinga chhal Pat Cummings leh a hote lakah he Eden Gardens-ah hian an chet fuh zan a inherchhuah leh ngei a ngai.

Aussies

World Cup leh Australia hi chu thil inzawm tlat an ni tawh a, an ṭhat loh ber ṭuma an lan pawha lo champion fo tawh leh tawnhriat ngah an ni. Hmakhawsang aṭanga Australia danglamna chu, team anga an khelh chhiat deuh ṭum pawh a, chhandamtu messia rawn pen chhuak thei an nei tlat ṭhin hi a ni a. Allan Border ,Steve Waugh, Andrew Symonds te mi hrang kal hmasa an awm tawh ṭhin a, tun ṭumah pawh Glen Maxwell kan hmu leh a nih kha. Australia batsman-te form an hmu ṭan a, an bowling department-in South Africa batting line up an ṭhiah vaih chuan, game over kan ti thei ang.

Eden Sulhnu

Mizoram State nih tir lam, 1987 khan he Eden Gardens, khang hun lai Calcutta-ah khan Australia hian World Cup nomawi an lo chawi tawh a. International cricket an rawn rah leh hnua South Africa te ipte pui banna chu Eden Gardens bawk hi a ni. He khelmual hi khelmual zau ber a ni lem lo a, a pitch lah hi batting tana duhthusam a ni. Record leh history zawng zawng dah ṭhain, vawiin tlai hian a zana khel ṭha zawk zawk an chak dawn a nih mai hmel. Mahse khua ṭha a, ruahsur lo turin ṭawngṭai ṭheuh i la.