Sinner lakah Djokovic a chak lo

Jannik Sinner chuan tun hma lama a thil la tih theih ngai loh a ti thei ta - ATP Finals khelh laia group match bikah Sinner hian Novak Djokovic a hneh a, world number 1 lakah hian a vawi khat nan hnehna a chang ve ta chiah a ni.

Thawhlehni zan Turin khawpuia inkhelah kum 22 mi Sinner hi 7-5, 6-7 (5-7), 7-6 (7-2) in a chak, hnehna chang tur hian darkar thum leh minute kua ngawt hun a hmang hial, inkhel inhnehtawk takah a vannei ta zawk.

Kum 36 mi Djokovic hi tun hnaiah a khel ṭha tluang a, a tlawm khat hle. July thlaa khelh zawh tak Wimbledon nomawi a chawi hnuah tun ṭum hi a chak loh lehna hmasa ber a ni a, group match a la nih avangin semifinal lut turin beiseina erawh a la nei.

Italian tlangval Sinner hian a match lehpekah chuan Holger Rune a hmachhawn ang, a zawna match 19 chak thei Novak hnehtu a nih avangin inrintawkna sang tak nen Rune a tum thei ang.

ATP Finals aṭang hian Stefanos Tsitsipas erawh hnungzâng hliam vangin a inhnukdawk a, Greek tlangval hmun ruakah hian Hubert Hurkacz a awm dawn. Polish tlangval hi zaninah Djokovic nen an inkhel ve leh thung dawn a ni.