England squad aṭangin Bellingham inhnukdawk

Real Madrid chhuanvawr Jude Bellingham chu Euro 2024 khel tur England squad aṭangin a inhnukdawk a, kum 20 mi midfielder hi a inhnuhdawh chhan ber chu a dar hliam a la dam chian loh vang a ni.

Bellingham bakah hian Chelsea defender Levi Colwill chu a inhnukdawk bawk a, kum 20 mi Colwill pawh hian a darah hliam a nei - ram tan vawi khat a inlan tawh a, inhnuhdawh ngai hi a ui khawp ang.

Bellingham leh Colwill hma hian Tottenham Hotspur attacking midfielder James Maddison, Newcastle United striker Callum Wilson leh Brighton & Hove Albion defender Lewis Dunk chu an lo inhnukdawk tawh bawk a, anni pathum hi Chelsea midfielder Cole Palmer, Aston Villa centre back Ezri Konsa leh Manchester City right back Rico Lewis te chuan an thlak.

Tunah player dang pahnih inhnukdawk leh mah se England boss Gareth Southgate chuan player pahnih hmun ruak luah tur hi a koh belh dawn lo a, tuna an squad neih sa angin qualifier an hmachhawn tawh ang.

England hian Zirtawpni zanah Euro 2024 qualifier khel turin Malta an mikhual dawn a, November 20 zanah North Macedonia an lenchilh zui dawn.

Three Lions hian match ruk an khelh tawhah tlawm nei loin, Germany-a Euro khel turin an tling chiang tawh a, an hmabak match hnih hi Southgate-a tan chuan player enchhinna a ni tawh ang - point thum an hmuh belh chuan group C hmahruaitu an ni chiang ang.

Hetihlai hian squad-a koh zinga mi Manchester United forward Marcus Rashford leh Manchester City midfielder Kalvin Phillips te chuan mimal thil avangin Three Lions squad an la zawm thei lo a, tun kartawpah an zawm ve dawn chauh a ni.