Ronaldo ka entawn ṭhin - Jota

Liverpool forward Diogo Jota chuan ram tana a khelhpui Cristiano Ronaldo chu a player entawn ber a nih thu a sawi a, Portugal legend anga kum tam hnu thleng pawha hma a sawn zel theih a beisei thu a sawi.

Jota chuan, "Kum a la naupan deuh lai hi chuan kan thatho em em reng a, mahse, chutihrual chuan tihsual pawh kan nei ngah nge nge ṭhin. Cristiano Ronaldo hi kei chuan ka entawn ber a ni a, kum 30 a tlin hma aiin kum 30 a nih hnuah goal a khung hnem zawk hialin ka hria.

"Chumi awmzia chu kum 26 kan nih hian, kan ṭhatlai leh vanglai tak tak tak kan la tawng lo tihna a ni thei a, chu chu ka beisei a, chutiang tur chuan ni tin ka thawkrim em em bawk a ni," a ti a, Ronaldo anga kum tam hnu thleng pawha goal la khung reng a duh.

Kum 26 mi Jota hi Liverpool tan khel mekin, tun season match 16 a khelh tawhah goal riat a khung a, Reds tan a season lina hmang mekin, Merseyside club-ah hian match 129-ah goal 49 a khung tawh.

Portugal tan match 35 khel tawha goal 12 khungin, a ngaihsan Ronaldo hian ram tan match 203 zet a khelh tawhah goal 127 a khung thung. Kum 38 mi Ronaldo hian tun season-ah Al Nassr tan match 23 khelin goal 22 a khung leh der tawh a, a la tar thei meuh lo.

Player pahnih hi tun international break-ah ram tan koh an ni a, Portugal hian zanin dar 1:15-ah Euro qualifier khel turin Liechtenstein an lenchilh dawn a, Pathianni zan dar 1:15-ah Iceland an mikhual leh bawk ang.

Portugal hi Euro 2024 khel turin an tling chiang tawh a, match hnih khelh tur an la neihah hian tlawm ve ve mah se, result-in an kal zel dan tur a nghawng phak tawh lo.