KHAWTHLIR

National Press Day

Vawiin November 16 hi National Press Day a ni a, he ni pual hian Information & Public Relation (IPR) department buatsaihin IPR auditorium-ah hun hman a ni dawn a, IPR-a thawkte leh MJA member-te bakah sawm bikte an tel ang.

Complaint thehlut

Champhai Nature Conservancy (CNC) chuan Champhai záwlah Khawchhak Tuipui khuah an duh loh thu Champhai District Magistrate hnenah ziakin an thlen. CNC chuan, Tuipui khuah a nih chuan luia nungcha tam tak tan harsatna a thlen theih dawn thu an tarlang. Zote leh Ṭiau inkar kawng siamtu SLT company-in phalna nei loa Ṭiau luiah lung an la nasa chuan luia nungchate tan harsatna a thlen thei dawna an hriat avangin complaint an thehlut a; Champhai záwl leilet (WRC) huam chhunga dan loa workshop sa, DC-in titawp tura a hriattir hnuah chhunzawm a la nih chungchangah complaint an thehlut bawk.

Chanchinbu thlang

Chief Electoral Officer hnuaia Media Cell-in ni tina chhuak chanchinbu zingah inthlan chungchang leh vote thlâk tura inzirtirna lam hawi kalpui ṭha berah Virthli chanchinbu (Aizawl) an thlang a, pahnihna Lenrual (Champhai) leh pathumna Zothlifim (Serchhip)-te a ni.

MNF-in an ui

MNF party chuan thuchhuah siamin, November 13, 2023-a thi ta leh nimina vui tâk Rev. Violet Louise Annie Mark (Pi Vaili) chu thinlung takin an sún a, an ui tak zet thu an tarlang. MNF chuan, Mara rama missionary hmasa ber Rev. RA Lorrain tunu Pi Vaili chu kum 1977-a an mission a tawp hnuah pawh an ram lama haw duh lo a ni tih sawiin, "Mizoramah chanchin ṭha hril chhunzawm zel a, a hun tàwp a hmang hi Zo fate thinlungah a dai ngai tawh lo ang. Ngaihsanawm kan tiin kan ngaihlu a, a hnathawh hi ropui kan ti tak zet a ni," an ti.

END-in heroin man

Mamita Excise & Narcotics department enforcement chuan November 14, Thawhlehni khan Bairabi-ah Lalnunngaii (44) w/o Lalrinthanga hnen aṭangin heroin hawng 13 an man. Lalnunngaii hi Kolasib-ah hruai a ni a, a lakah thubuai ziah luh a ni.