RG Stadium an peih ta - vawiin tlaiah I League

I League khelh nan RG Stadium, Mualpui grass a ṭhat tawk loh avangin an thlak a, tunah chuan an peih ta. Vawiin tlai dar 4:30 hian Aizawl FC-in tun season atana home match hmasa ber an khel dawn a, an khingpui tur chu Delhi FC an ni.

Flood light hnuaia Aizawl FC inkhel en man hi Rs 200 a ni dawn a, kan khawtual ngeiah weekend hmanna tur a awm dawn. Chutihrualin en man hi a to mah mah deuh em aw a tih theih! Mahse, Mizo club hian season bul an ṭan ṭha a, Mizo mipui ṭawiawmna an dawn ṭhat bawk chuan kum 2016-17 hnuah I League nomawi an chawi thei hial ang.

AFC an ṭha em?

Aizawl FC-in match hmasa berah Mohammedan SC hneh lo mah se Sreenidi Deccan leh Nercoa te an hneh. Mizo club hian Delhi FC an hneh a nih chuan a zawnin vawi thum an chak dawn a, table-ah pawh a sang pathum zingah an tel thei ang.

AFC hian position hrang hranga Mizo player ṭha an la khawm a, squad tih chhan nan foreign defender pahnih Gustavo leh Ivan Maric te an nei a, state pawn player goalkeeper Nora Fernandes leh midfielder Sheikh Sahil te an nei bawk.

Serbian defender Maric hi inhliam vangin match hnuhnung pahnihah a khel tawh lo a, Delhi FC lakah a dam hman ang em tih a chiang lo. Chutihrualin Marin tel lohna inkhelah Mizo club an chak ve ve.

Match thum khelh tawhna aṭanga thlir chuan AFC hi an ṭha ve thawkhat a, table chunglama awm thei turah an ngaih theih. Chutihrualin champion tur chuan foreigner ṭha zawk an mamawh belh niin a lang a, an la belh dawn lo a nih erawh chuan Mizo player-te an che ṭhat a ṭul viau ang.

A phurawm

I League-ah Mizo coach B. Malsawmzuala kaihhruai hnuaiah Mizo club-in hnehna an la chang ve ve a, Mizoramah ngei Mizo mipui hmaah eng ang chiaha ṭha nge an ni tih fiahin an awm dawn.

Sawmtea hnuaiah Aizawl FC-in match hnihah goal nga an khung a, hei hian inkhel en a ti châkawm hle. MPL10-a goal sarih khung tawhtu Lalrinzuala'n I League-ah hattrick a siam a, RG Stadium-ah goal khung chhunzawm a duh ang.

Rinzuala thlawp tura mual sira awm thei R. Ramdinthara, R. Lalthanmawia leh Lalbiakdika te an khel ṭha ṭhin a, Neroca an hneh ṭuma BD-a rawn che ṭha khan a ṭha lam zawngin coach Sawmtea ngaihtuahna a tibuai ngei ang.

Tlarhnungah captain Lalchhawnkima'n bul a rawn ṭan a rinawm a, Calcutta Football League khelh vanga MPL10-a la inlan lo Kimkima tan tun season-a Aizawl FC jersey nena bul a ṭan hmasak ber tur a ni.

Chetsual theihna Delhi

Delhi FC hian match thum an khelh tawhah chak, chak loh leh inhnehtawk an nei vek tawh. AFC coach hlui Yan Law-a'n Delhi hi a enkawl a, MPL9 best midfielder K. Vanlalhriatzuala'n hmun pawimawh a chang.

Khawlailung tlangval Hriatzuala hi a la khel tluan vek. Mizo tlangval Hriatzuala leh tuna Aizawl FC striker Rinzuala te hi season liam taa Delhi FC second division-a champion puitu an ni.

I League ṭan meuh chuan Hriatzuala la cham mah se Rinzuala'n Aizawl FC a zawm ta zawk. Delhi FC hi I League kai thar ni mah se dah hniam theih an ni lo. Minerva Academy neitu Ranjit Bajaj-a'n ISL club ni ta Punjab FC chu Roundglass hnenah a hralh a, Delhi FC-ah Ranjit hian neitu nina 90% a lei ta zawk.

Ranjit Bajaj-a'n neitu nihna a neih miau avangin Delhi FC hian 2017–18 I League champion Minerva Punjab player kha an la chhawm nual a, tawnhriat nei player an kawl miau avangin Aizawl FC tan fimkhur a ṭul ang.