India-in final an lut - ropuina neitu King Kohli

Wankhede Stadium a ni a, Virat Kohli a ṭhingṭhi hnawk a, executives box lam a hawi - chutah chuan cricketer ropui bera tam takin an ngaih Sachin Tendulkar leh English footballer ropui David Beckham an ṭhu.

Kohli-a ṭhingṭhit chhan erawh a naupan lai aṭanga a ngaihsan Sachin zahna chibai buk nan a ni a, chutianga a tih chhan chu ODI-ah a vawi 50 nana century a siam vang a ni - rei tak chhung Sachin-a record lo ding tawh, vawi 49 zet ODI century siam chu a khum ta.

Nilaini zan khan Cricket World Cup 2023-ah India chuan run 70-in New Zealand an hneh a, King Kohli hian run 117 zet a siam - Shreyas Iyer chuan century a vaw chhuak ve bawk a, India hian over 50-ah run 397 zet siamin wicket li an hloh.

New Zealand an duai bik lo. Daryl Mitchell chuan run 134 zet siamin, a team tan beiseina a siamsak hman. Mahse, India hian bowler, a hming Mohammed Shami an nei a, wicket sarih ngawt a la! Black Caps hian over 48.5-ah run 327 an tlin hman a, an out vek avangin India an chak a, final an lut.

King Kohli

Mumbai khawpuiah India-in ṭhum vawrah vanneihna changin, vawm hmasak an thlang a, bul an ṭan chhe lo. Rohit Sharma chuan ball 29 lekah run 47 a rawn siam a, a tawp thlenga out loin a dinpui Shubman Gill chuan run 80 a siam bawk.

India tana 'show' tak tak a inṭan erawh Virat Kohli inlar hnu a ni a, mi tam takin cricketer ropui ber ang hiala an chhal ṭan Kohli hian ball 113-ah run 117 zet a rawn siam a, New Zealand fielder-te a tlantir nasa hle.

Shreyas Iyer lam hmaih a thiang lo - kum 28 mi batter hian ball 70 lekah run 105 a rawn siam ve bawk a, a tawp thleng dama run 39 siamtu KL Rahul pawh a khel chhe lo. Batter dang an khel ṭha em a, chance a nei har mai zawk a ni!

India hian over 50-ah run 397 an siam a, wicket li chiah an hloh. Black Caps tan um pha turin record siam ngai khawpa tam a ni a, chutihrual chuan an theihna leh Wankhede khelmuala batter tana chet ṭhat a awl tih hretu tan thlamuang taka awmna chi a la ni chuang lo.

Beiseina

New Zealand tan Devon Conway leh a nu leh pa ten Sachin leh Rahul Dravid an ngaihsan em avanga 'Ra' leh 'Chin' lai laa Rachin Ravindra hming an pek, Black Caps tana inlan Rachin te an rawn pen chhuak.

Mahse, New Zealand tana ding hmasa pahnih hian run 13 ve ve chiah an siam a, New Zealand ṭantute tan a hmuhnawm lo! Mahse, captain Kane Williamson-a'n mawhphurhna lain, run 69 a rawn siam a, Daryl Mitchell a che ṭha lehzual.

Kum 32 mi Mitchell hian ball 119-ah run 134 zet a rawn siam a, pui hem hem tak a ni - target 390 zet siam theitu India fan-te meuh pawh an hlauthawng a, New Zealand-in chak chance an nei tih an hai lo.

Mahse, India tana tournament duhawm tak hmangtu Shami kutah bawk Mitchell hi a 'out' a, a hnuah Glenn Phillips (41 runs) che ve leh mah se, batter dang zingah che thei an awm tawh lo a, over 48.5-ah run 327 siamin an out vek!

Aw nang Shami!

India tan match hmasa paliah Shami a lang phak lo a, hei hi Men in Blue lamin playing 11-a batting all-rounder dah an duh vang a ni - top-order chetsual palh laka invenna atana an tih a ni ber.

Men in Blue hian an hriat lohin an hmanraw neih ṭhat ber zinga mi an lo dah reng a, tunah chuan team chakna hnar a ni ta - Black Caps lakah wicket sarih a la a ni satliah lo. Shami hian over 9.5 a vawmah run 57 chiah a pe.

New Zealand batter ṭha Conway, Ravindra, Williamson, Mitchell leh Tom Latham te chu a kuta 'out' vek an ni a, New Zealand kal zel tur chhu chattu a ni - inkhelh zawha 'Shami Shami' tia fans au rual te, au ring zual tura Kohli-a'n a ti kha a awm takzet.

Kum 33 mi Shami hian tun World Cup-ah wicket 23 zet a la tawh a, ani aia wicket la hnem an awm rih lo. Cricket World Cup final hi November 19, Pathianniah khelh a ni dawn a, nimina South Africa leh Australia inkhela chak zawk nen India hian champion an inchuh ang.