Sanga hoten kawng dik an zawh

Toyota MPL10 phase 1-a beisei pha lo Chhinga Veng FC-in phase 2-ah bul an ṭan ṭha a, Lalsangzuala Hmar kaihhruai Chhingcows hian nimin khan Project Veng FC 2-1 in an hneh. Chhinga Veng hian match riatah point 11 an hmu a, palinaa awm Aizawl FC nen an point hmuh zat a inang.

1st Bn MAP Ground-a inkhelah Project Vengin chawlh laiin an thawkrim tih a lang a, an chance ṭha neih hmasak crossbar pet per nan an hmang. Chhinga Veng striker PC Lallawmkima erawhin minute 28-naah Isaak Malsawmkima cross chu goal-ah ṭha takin a chantir thung.

Chhingcows bul ṭantu zingah Mizoram aiawh Santosh Trophy-a tel paruk an tel a, club anga training an neih tlai a lang lo. Sanga hote khel ṭha zawk hret mah se minute 56-naah Jehova Lalthangsanga'n freekick aṭangin Project Veng tan siphurh a sut a, keeper Lalhruaizela a chesual.

Goal khat hian Project Veng phurna a pe a, Kolasib club goal bawh a nat phah a, keeper Hruaia'n inrintawkna a hloh. Chutihrualin hun tawp lamah inrintawkna a nei let a, Project Veng striker-in a tibuai chungin cross ball nghet ṭha takin a man.

Minute 80-naah player ṭha danglamna a lang a, Project Veng defender tisual hmang ṭangkaiin Chhinga Veng winger Lallawmsanga'n la lutin cool takin chakna goal a khung. Chhingcows coach Lalsangzuala Hmar chuan, "Kan squad a pan a, han ṭawng pawr thei kan ni lo. Semifinal sawi nan a la hma mah mah," tiin Vanglaini a hrilh.