Tlai dar 1:00-ah MPL inkhel ṭha bik : Chanmari FC Vs Mizoram Police

Toyota MPL10 ṭan khan Chanmari FC leh Chhinga Veng FC te hi champion beiseiawm zinga mi an ni a, phase 1 khelh zawh hnuah pawh champion rinkai an la ni chhunzawm zel. Vawiin tlai dar 2:00 hian Chanmari leh Mizoram Police te hi 1st Bn MAP Ground-ah an inkhel dawn a, MPL inkhel ṭha bik tiin a sawi theih ang.

Santosh Trophy final round thleng thei Mizoram team-ah team pahnih player-te hian hmun pawimawh an chang a, hei hian an ṭhatzia a nemnghet. Chanmari hian Mizoram captain Lalrinchhana Tochhawng tlarhnung an kawl a, Santosh Trophy group stage top scorer Lalkhawpuimawia bakah Uttarkhand laka Mizoram tana chakna goal pawimawh khungtu Laltlanzova te an kawl.

Mizoram tlarhnungah Lalmawizuala a ṭangkai ṭhin a, midfielder pahnih Crespo Vanlalhriatpuia leh Lalthangliana ten theihna an nei sang. Hei aia pawimawh erawh coach K. Malsawmkima hnuaiah Chanmariin training an nei ṭha a, Santosh Trophy khelh lai pawhin an chawl lo. Laldanmawia, Zothanmawia, Lalpianthanga leh C Zohmingsanga ten Mizoram kawr ha tlak an ni tih pholan an tum ang.

Team pahnih hi an intawn hmasak khan Chanmari hian first half-ah 2-0 in hma an hruai a, inkhel an thunun bawk. Mahse, second half-ah Police tawnhriat neih ṭhatna a lang a, 2-2 in inkhel a tawp. Injury time-ah phei chuan Police goal bawh a na tawh zawk.

Police tawnhriat neih ṭhatna tak hi Santosh Trophy-ah Mizoram tan a hlu ṭhin hle. Tlarhnungah keeper F. Lalmuanawma, defender Lalhmunawmaia leh Lalrinzuala bakah midfielder H. Lalbiakthanga leh R. Malsawmtluanga te chu innghahna lungpui an ni.

Mizoram team-a zin ve lo; Lalbiakhlua (Biaktea), Malsawmfela leh Lalfakzuala te hi Mizoram tana vawi tam feh chhuak tawh an ni a, Lalbiaksanga Colney hote hian tawnhriat an nei ṭha hle. Chutihrualin MPL10-ah erawh player naupang zawk Lallawmkima Fanai chu tlarhma lamah a pawimawh a, Chanmari tlarhnung tan pawh ven uluk a ngai ang.

MPL table thlirin Chanmari dinhmun a ṭha viau a, Police erawh Chhinga Veng chet ṭhat dan a zirin a la derthawng thei dawn. Hei vang hian BS-a Colney hote hian chak ngei an tum dawn a, chutihrualin Mala kaihhruai Chanmari hian an result ṭha chhunzawm an tum dawn a ni.