Silly Point : WHISSSS!
Ṭum khat chu Professional Cricket ka khelh ve lai khan, Ranji Trophy-ah tumpui Pondicherry te kan hneh lo deuh nen, ni hnih tal tawp kan fielding tawh a. Kan team bat lai chuan dressing room-ah ka lo mutthlu chu niin. Ka luh hun a lo thleng, khelmualah tho phang, la chau deuh si nen ka pen lut, kan tumpui Indian team fast bowler feet 6 leh inchi 6 vel zeta sang Pankaj Singh-a'n darkar khata 140km vela kawh mar pat mai a meter 20 vel aṭangin Pondicherry khelmualah ball a rawn vawm mai chu, a chet hian ka che hman lo hi a ni ber.
Mahse ka mutchhuak zawng zawng chu bo vekin ka va han harh ching lawi si em. A hnua team intihhlimna kan thlenna Hotel-a kan neih ṭumin kan teammate leh khami inkhela ka bat pui Akhil Rajput chuan, khami ṭuma ka awmdan kha zirin, "Ruata Bhai chu a bat a che hman lo, Whissss a ti" tiin min fiam. Team ho an va nui thler nasa tak. Khata ṭang khan 'Whiss' tih ṭawngkam hi tun thlenga ka awm tak loh hnu pawn Dressing room ṭawngkam leh infiamna a ni chhunzam ta zel a ni.
Mumbai Chawhnu
Wankhede pitch lei sen kha a tir lamah chuan ball bat-ah a kal ṭha vak dawn lo emaw a tih theih a. Mahse, a tih ṭhin ang bawkin kaptan Mumbaikar Rohit Sharma-a'n 5th gear in bul a ṭan nghal a. Chu bul ṭan ṭhat zar zoin, Virat Kohli leh local boy tho Shreyas Iyer ten century pawimawh tak an siam a. World Cup semifinal-a run 397 kha chu ṭha tawk thawkhat viau tura ngaih a ni.
Mumbai Zan
Inkhelh hma zan practice an neihna lamah dai a tla nual a, mahse vanneih thlak takin tun ni lai zan erawh Mumbai-ah dai a tla lo. Chutihrual chuan stadium light an han chhit en a, ball var thar lai over 10 chho vel an ral chhoh chuan batting tan a nuam telh telh tih a ni ṭhin. Tun World Cup-ah India-in anmahni bei let tlattu, Over 15 hmalama wicket 3, 4 hloh lo team awmchhun an tawnna ni tlat.
Daryll Mitchell-a'n a khat tawkin khelmual pawnah ball a hlap chhuak ve sek nen, captain cool Kane Williamson lah a tih ṭhin pangngai - ding nghet churh mai bawk si. Engmawlai phei kha chuan Semifinal-ah bawk Hamara Desh hi kan bye bye leh dawn a nih hi kan ti hman a ni.
Md Shami - I te ber tawp lo
World Cup ṭan tirh lama starting 11 a lang lem lo, all rounder leh vice captain Hardik Pandya inhliam avanga hmun chang Md Shami a chanchin aṭang hian: "Beidawng lo a, kan tih tur ti a, ngawi renga kan hun lo nghah mai," a finthlakzia hi Mizo ṭhalaite hian kan zir thei awm e.
A spell ball vawm hmasak bera wicket lak dan trick a zir thar emaw tih mai turin, tun World Cup a game 6 chauh la inlan siin, wicket 23 a la der tawh a. World Cup History a wicket 50 la rang ber record rawn siamin, India innghahna a ni zel dawn pawh a nih hmel.
Technical Thlirletna
Rohit Sharma-a'n vuak hmasak a thlang kha a tifuh ta lo mai ang em aw? tiin thinphuin ka lo awm ve reng a. Daryl Mitchell leh Kane Williamson a partnership kal tluanlai ngat phei kha chuan, "A tisual ngei e" ka lo ti hman a ni.
Kiwis ho khan tihsual tam tak an nei lem lo. Mahse thil pakhat kan mawhpuh dawn chuan ball 300 an hmachhawn zinga dot ball 138 zet an nei kha dot ball 106 chiah nei India nena an inkar daidangtu ka ti lo thei lo. (He statistics hlu tak hi, ka BCCI Official Scorer Durtlang tlangval Lalchhuanawma min rawn thawn a ni a. A chungah ka lawm hle) Eng ang pawn 4 leh 6 hi vaw tam mah ila, a chang hi chuan he inkhel khirh leh technical deuh a lang Cricket hi chu, mawlmang zawka lang leh a basic bawk hi chak leh chak loh inkar hriltu a ni si ṭhin a nih hi maw. India aia dot ball chawhruala over 5 chuang zet an hmangral kha a pawi ta a ni.
A pumpui boruak
David Beckham, Rajnikanth leh Ranbir Kapoor a te VIP box a ṭhu - lawm avang leh hlauhthawn avanga hmel inthlak danglam zak zak kha "Whisss" kan ti lo thei lo ang. Kha Nilaini chawhnu leh zan Mumbai boruak uap taka kara India leh New Zealand fan-te lawm leh pawi tihmel leh chezia pendulum ang maia a inthen thlak zawk zawk na hnuaiah khan, Kiwis batsman-te tan Md Shami kha "Whiss" tih tirtu ber a ni ta a. A hmun leh TV a Mizoram kilkhawr thlenga lo thlirtute pawh, a khat tawkin kan "Whisss" reng mai a nih ber
kha maw...