Switzerland tana inlan hnem ber Xhaka

Granit Xhaka chuan an ram Switzerland tana khel hnem ber record a siam. Nilaini zan Euro 2024 qualifier inkhelah Xhaka hi a inlan a, an ram tan match 119 a khel tling ta chiah a ni.

Switzerland leh Israel te hi Felcsut, Hungary-ah an intawng, ram pahnih hi 1-1 in an inhnehtawk. Israel hi Hamas nen an indo mek avangin an ramah inkhelh theih a ni lo, anmahni khelmuala an khelh aiah ram dangah mikhual an dawnsawn a ngaih phah.

Swiss team hi Euro 2024 atan an tling chiang tawh a, an captain Xhaka tan major tournament parukna a ni ang. Kum 31 mi Xhaka hian record inṭawm a lo chelhpui tawh Heinz Hermann (match 118) chu a khum ta a ni.

Arsenal midfielder hlui hian kum 18 mi chauh a nih laiin an ram tan a khel ṭan a, a match hmasa ber kum 2011 June thlaa England nen Wembley Stadium-a an intawn ṭum kha niin, a hnu lamah player pawimawh a ni chhunzawm ta zel.

Xherdan Shaqiri pawhin Swiss tan match 117 a khel tawh a, inkhelh a la chawlhsan loh avangin record siam thei dinhmunah a la ding ve bawk. Israel an hmachhawn ṭum hian Shaqiri hi bench lamah ṭhuttir a ni thung.

Kum sarih zet Gunners tana a khelh hnuah nipui bazar lai khan Borussia Monchengladbach a pan. German club lamah hian Xabi Alonso kaihhruaina hnuaiah a vul leh mek - Bundesliga hmahruaitu an nih theih nana player pawimawh berte zinga mi a ni.