Alcaraz chak niah Medvedev a tlang

Carlos Alcaraz chuan ATP Finals khelh laiah chak ni hmel a hmu ta, a khingpui Andrey Rublev hnehin semifinal luh beiseina a la nei zel - zanin hian Daniil Medvedev nen an inhmachhawn zui leh nghal ang.

Nilaini zan Red Group inkhel dangah Daniil Medvedev chuan match hmasa lama Alcaraz hnehtu Alexander Zverev chu 7-6 (9-7), 6-4 in a lo hneh a, Russian tlangval Medvedev hi match vawi hnih a khelh tawhah a chak ve ve avangin semifinal a lut fel der tawh.

World number 2 Alcaraz pawh a match hmasa zawkah chak lo mah se a chesual nawn lo. Spanish tlangval hian seeded pangana Rublev hi 7-5, 6-2 in a hneh a, match hnih khelhah chak la nei lo Rublev tan semifinal beiseina a bo tawh a ni.

Kum 20 mi Alcaraz hi season hmasa pawh khan ATP Finals khel tur hian a tling phak, mahse hliam vangin a thiam zual pariat inelnaah hian a tel thei lo. A tan kumin hi a inlan vawi khatna a nih avangin thil a awlsam vek bik lo.

US Open leh Wimbledon champion ni tawh Alcaraz chuan, "Ka match hmasa nen kha chuan khaikhin chi pawh a ni lo, engkim mai kha a danglam em em vek mai a ni. Rublev laka ka khelh ang hi ka chhunzawm thei a nih chuan beisei pawh ka nei sang ve hle ang," a ti.

Alcaraz tan a match hmabak hi a awlsam dawn lo, a khingpui tur Medvedev hi semifinal lut chiang tawh ni mah se a ti mai mai dawn lo tih a rin theih - hard court hi a inkhelh thiamna niin, kum 2020 khan a lo champion tawh bawk avangin hmachhawn a awlsam lo khawp ang.

Medvedev tan pawh nikum kha hun duhawm lo a ni, a group match khelh hoah chak lo vekin semifinal a lut phak lo. Kuminah erawh thawnthu a danglam, khelh hmabak pakhat nei chungin a inhlangkai fel der tawh.

Seeded pathumna Medvedev chuan, "A tir lamah khel ṭha viau mah ila a hnu lam kha a harsa khawp mai. Set hloh loin ka chak a, chutihrualin set tawp lam pahnih kha chu a harsa takzet, taksa mai bakah rilru pawh a hah hle.

"Kan group-ah hian player leh leh intiattawk tak tak kan awmkhawm, chumi aṭanga tlang thei nih chu lawmna tur pawh a ni reng a ni," a ti. A khingpui leh tur Alcaraz leh Andrey pawh a en tih sawiin, a hautak dawn tih a sawi lawk bawk.