Venghnuai an vanduai

Toyota MPL10-ah FC Venghnuaiin second phase-ah chak nghal thei turin an khel ṭha a, amaherawhchu penalty vawi hnih an hlah bakah offside vanga an goal khung an pawm loh avangin goal an khung lo. Venghnuai hi Electric Veng nen 0-0 in an inhnehtawk.

1st Bn MAP Ground-ah nimin khan MPL 10 khelh chhunzawm a ni a, Venghnuaiin chawlh an hmang ṭha. Coach thar F. Malsawmzuala (Tetea) hnuaiah an fitness a ṭha tih a lang bawk.

First half-ah goal a lut lo. Chutihrualin, EFC forward Samuel Lawmsiamkima ball pet keeper Lallawmkima dan chu a ṭha hle. Second half tirah Venghnuai tan Lalhmunmawia (Amawia) a rawn lut a, penalty a hlawh chhuak. Amawia hian pet nghalin EFC keeper Simon Lalṭhazuala Hmarin a dansak. Simon hian goalline a pelh avangin an pet nawntir. C. Ramdinmawia'n rawn petin Simon-a'n a dang leh tho.

C. Ramdina a vanduai a, a ball pet ṭha chu goal-ah lut mah se keeper Simon-a tibuai theia awm Amawia a offside avangin pawmsak a ni lo. EFC pawhin chance ṭha bik an hlah, Lalruatsanga'n goalkeeper chauh a hmachhawn hnuah goal zawnah a pet lo. Goal awm loin an inhnehtawk a, penalty dangtu EFC keeper Simon chu man of the match-ah thlan a ni.