Chak mamawh Italy inlan zan a thleng

Euro 2024 qualifier-ah Italy chu zanin dar 1:15 hian an inlan dawn a, North Macedonia an mikhual dawn - European champion lai hi table-ah pathumna an ni mek a, an chunga awm Ukraine chu point thumin an phak lo mek.

Group C aṭang hian zanin dar 1:15-a Malta mikhual tur England chu tling chiang tawh an ni a, hmun ruak pakhat a la awm - he hmun ruak hi Ukraine leh Italy te a la chang thei ve ve an ni a, an la intawng dawn bawk!

Ukraine hian Italy aiin match khatin an khel tam a, match khat chiah khelh tur an nei tawh - chu chu Italy nena an intawn tur a ni. Italy hi zaninah tlawm ta se, Ukraine tan match tawp bera draw result hlawhchhuah a tawk ang.

Italy tan zaninah an chak loh chuan match tawp berah chak ngei ngei a ngai dawn a, Ukraine aia goal difference an neih ṭhat a ṭul dawn bawk. An chak erawh chuan match tawp berah draw result a tawk dawn.

Azzurri-in chak an mamawh vanglai takin an ṭhat dan berin an inlan thei dawn lo a, Napoli right back Giovanni Di Lorenzo chu hrem vangin a inlan thei dawn lo - Rafael Toloi, Alex Meret, Manuel Locatelli leh Davide Calabria te an inhliam bawk.

October khan Italy hian qualifier-a an match hnuhnung ber khelin, England an hmachhawn a, 3-1 in an tlawm. He inkhela inlan zinga mi Destiny Udogie, Gianluca Mancini leh Giorgio Scalvini te pawh an inlan thei dawn lo!

Hei vang hian Italy boss Luciano Spalletti-a'n ram tana la inlan ngai lo Juventus full back Andrea Cambiaso leh Monza playmaker Andrea Colpani te a koh a ṭul a, Azzurri tan North Macedonia lakah hmel thar an inlan nual mai thei.

Spalletti-a'n Ciro Immobile mamawh loah a inngai a, kum 33 mi striker hi squad-ah a telh lo. Chuti a nih chuan Juve forward Federico Chiesa, Sassuolo forward Domenico Berardi leh Atalanta striker Gianluca Scamacca te mawhphurhna a sang sawt dawn tihna a ni.