Second round-ah Prannoy chak lo

Badminton inelna Japan Masters khelh laiah HS Prannoy chuan hnehna nen bul ṭan mah se second round-ah a chak lo. India tlangval dang Lakshya Sen leh Priyanshu Rajawat te erawh hneh nei loin an zinkawng a tawp nghal a ni.

Kum 31 mi Prannoy hi hnungzâng hliam dam hlim a ni a, a khingpui Hong Kong tlangval Lee Cheuk Yiu-a chu 22-20, 19-21, 21-17 in a hneh. Player pahnih an inkhel tawk takzet a, darkar khat leh minute li an inbeih hnuah Indian shuttler a vannei ta zawk.

Nimin tlai khan second round a khel zui a, Chinese Taipei tlangval Chou Tien Chen nen darkar khat leh minute 13 an inkhelh hnuin 21-19, 16-21, 19-21 in a vanduai zawkah a ṭang - India player an tla kim tihna a ni.

Prannoy-a'n inelna a hmachhawn hnuhnung chu Asian Games kha niin bronze medal a la, a hnuah hliam vangin tournament pahnih aṭangin a inhnukdawk - tunah chuan Paris Olympic khelh beisei turin kawng dik a zawh thei leh dawn ṭan niin a lang.

Kum 17 mi Sen-a erawh a chak lo. India rawlthar hian Kodai Naraoka chu 17-21, 10-21 in a ngam lo a, inkhel dangah world number 5 Rajawat pawhin Chinese Taipei mi Lin Chun-Yi chu 15-21 12-21 in a ngam lo.

Lakshya Sen-a hian kuminah Canada Open nomawi a chawi a, Priyanshu Rajawat pawhin Orleans Master title a la. Tun ṭumah pawh hian beisei an nei sang ngam a, amaherawhchu result ṭha an nei thei ta lo a ni.

Men’s doubles pair - Satwiksairaj Rankireddy leh Chirag Shetty te pawhin nimin khan an match hmasa ber an khel a, hneh nei loin an zinkawng a tawp nghal ve bawk.