Zan khatah Joshua leh Wilder inlan dun dawn

British boxer langsar Anthony Joshua leh Deontay Wilder te chu December 23 hian Riyadh, Saudi Arabia-ah an inlan dawn a, mahse, boxer pahnih hi an inhmachhawn dawn lo - khingpui hran ve ve an tum dawn a ni.

Joshua hian Otto Wallin a hmachhawn dawn a, American boxer Wilder hian world champion hlui Joseph Parker a hmachhawn dawn thung - boxer pahnih hian hnehna an chan ve ve chuan nakkumah an inhmachhawn thei ang.

December 23 zana inhnek ropui tura ruahmanah hian Tyson Fury vs Oleksandr Usyk chu main event tura ruahman a ni a, mahse, Fury hian tun hnaia Francis Ngannou nen an inhnekah hliam a neih avangin a thleng thei ta lo.

Joshua hian world heavyweight title chu Usyk laka a hloh hnuin insiamṭhat hna a thawk mek a, hetihlai hian Wilder chuan WBC heavyweight title a kawl chu Fury lakah a chân ve bawk.

Kum 34 mi Anthony Joshua hian Usyk hi vawi hnih ngawt hmachhawn mah se, hnehna a chang zo lo ve ve a, WBA (Super), IBF, WBO, leh IBO heavyweight title a kawl laite chu a chân a ni.

Usyk laka a tlawm hnuah Joshua hian Jermaine Franklin leh Robert Helenius te hmachhawn tawhin, hnehna a chang ve ve a, vawi 29 fight a hmachhawn tawhah vawi 26 chakin, vawi thum a tlawm thung.

Kum 34 mi Joshua hmaa ding tur Otto Wallin hi Swedish boxer a ni a, world heavyweight title la hnek chhuak lo mah se hneh a awlsam bik lo ang - vawi 28 fight hmachhawn tawhin vawi 26 a chak a, vawi khat chiah a la tlawm. Kum 32 mi Wallin-a hneh loh awmchhun hi Tyson Fury a ni a, unanimous decision-in a ngam lo.

American boxer hnek na Wilder pawhin a zawna Fury a ngam loh hnuah insiamṭhat hna a thawk mek a, British boxer laka a tlawm hnuah vawi khat inhnek leh tawhin, October 2022 khan Robert Helenius chu round khatna lekah a knockout!

Kum 38 mi Wilder hian vawi 46 fight a hmachhawn tawhah vawi 43 hnehna a chang a, vawi hnih a tlawm - a chak zinga vawi 42-ah a khingpui a knockout a, a tlawm vawi hnih hi Fury lakah ve ve a ni.

Wilder-a hmachhawn tur Parker hi a nep bik lo. Vawi 36 fight hmachhawn tawhin vawi 33 a chak a, vawi thum a tlawm - a ngam lohte hi Anthony Joshua, Dillian Whyte leh Joe Joyce an ni a, mahse, a hneh zingah hian Derek Chisora leh Andy Ruiz Jr. te an tel tih hriat a ṭha.

Kum 31 mi Parker hian WBO heavyweight title a lo kawl reng tawh ṭhin a, mahse, Joshua lakah a hloh - a ropuina hloh tawh neih let tum ve mek tho a ni a, Wilder tan New Zealand boxer hi chetsual theihna tur a ni ang.