Intihhlimna lam a tam zawk - Verstappen

Max Verstappen chuan tun kartawpa tlan tur Las Vegas Grand Prix chu infiamna lam a ni vak dawn lo niin a sawi a, intihhlimna lam 99% niin infiamna chu 1% chauh ni dawn maia a hriat thu a sawi hial.

Pathianni chawhma dar 11:30 hian Las Vegas Street Circuit-ah Las Vegas Grand Prix an tlan dawn, hlimhlawp bawlna khawpui an tih mai LA hian a vawi khat nan car intlansiakna sang ber hi a thleng dawn a ni.

Verstappen chuan, "Zep tur a awm lo a, a nihna tak sawi chuan sum an siam hnem dawn. Mi tam zawkin ennawm anga kalpui an duh miau a, chuvangin kan ngaihdan leh duh danin awmzia a nei thuk lo, kan ngaihdan leh hmuh dan erawh kan sawi ve thiang," a ti.

Lewis Hamilton leh Fernando Alonso te erawh an phur viau, khawpui lian leh changkanga inelna an neih dawn avangin thil danglam leh a behbawn hmuhnawm a awm tur chu awm an tih thu an sawi ve thung.