Inter leh Martinez inkar a nghet - Agent

Tunlai striker hmuhnawm leh hlauhawm berte zinga mi Lautaro Martinez chuan Inter Milan chhuahsan tumna a nei rih lo. A agent Alejandro Camano chuan contract thar ziak turin inbiakna a kal mek tih a sawi.

Argentina international hi a contract neih lai ang chuan kum 2026 June thla thleng San Siro-ah a cham ang. Inremna hi la rei viau mah se tunlai hian pawtsei turin an inbe mek - club dangin an lak chak a nih avangin Inter tan chuan nghet lehzuala thlun a ngai.

Alejandro Camano chuan, "Kan inring tawn em em a, chuvangin harsatna a awm lo ang. Inter leh Lautaro inkar hi chu rin phak baka thuk leh ril a ni a, a nihna takah chuan a football hun pumpui a hmang zo a nih pawhin a mak lo ang.

"Chutihrualin club hian thil tum fel leh sang tak an neih erawh a ngai a, sum tam leh hlawh ṭha zawk tura thlemna leh sawmna a dawng reng a nih chuan Martinez tan pawh rilru nghet neih a harsa ve thei bawk," tiin Inter Milan chu thiam takin a kar.

Tun season kal laiah Martinez hian Serie A leh Champions League match 16 aṭangin goal 14 a thawkchhuak leh tawh a, a club hi Italian football inelna sang berah hma a hruai pui mek a ni.