Cricket World Cup Final : Kum 20 hnuah India-in phuba la thei dawn em?

India-in mahni ramah Cricket World Cup nomawi chawi an tum a, an hmaa ding erawh World Cup nomawi chawi thiam bik tia sawi ngam Australia an ni. Record thlir chuan tun World Cup-ah India an chak vek a, Aussies ngei pawh hi an sawp. Mahse, final boruak erawh a danglam ṭhin a, hei tak hi final tien châkawmtu chu a ni.

November 19, Pathianni tlai dar 2:00 hian Narendra Modi Stadium-ah India leh Australia ten World Cup nomawi an inchuh dawn a, Hamaresh Desh mipuin inkhel hi an ngaihven dawn a, 2003 final hre pha chin chuan tun ṭum final hi an ngaihven lehzual ang.

Kum 20 liam ta

March 23, 2003 khan Wanderers Stadium, Johannesburg-ah Australia leh India ten final an khel a, hetih hunlaia India batting line up chu ṭha ve tak a ni. Sachin Tendulkar leh Virender Sehwag ten bul an ṭan ṭhin a, captain Sourav Ganguly, Mohammad Kaif, Rahul Dravid leh Yuvraj Singh te an awm.

Ganguly captain-na hnuaiah Tendulkar hoa champion inbeiseina a lian a, mah se beiseina ni loin duhthusam mai a lo ni zawk. Ṭhumvawra vannei Ganguly-a'n engmah a hre lawk bik si lo a, vawm hmasak a thlang.

Harbhajan Singh-a'n opener pahnih Adam Gilchrist (57) leh Matthew Hayden (37) te a vawm hlum tih loh chu wicket an la tawh lo a, captain Ricky Ponting (140) leh Damien Martyn (88) ten an inhlap siak a ni ber. Over 50-ah 359 runs a ni a, an khelhna hmun hi batting pitch ni bawk mah se kum 20 liam ta kha India-in an bat hauh hma khan beisei a tawp a ni ber.

India ram chhuan tawlawl Tendulakar-a'n (4) beisei a pha lo a, Sehwag (82) chet ṭhat a tawk lo. Tailender (a tawp lama awm, ball vuak aia vawm thiam) run siam zat belhkhawmin 20 runs a tling lo. Over 39.4-ah India-in 234 runs an siam a, an thi fai vek - Glenn McGrath leh Brett Lee te an ngam lo. India chak lohna zat chu 125 runs a ni a, tun thlengin Cricket World Cup final-a insawpna nasa ber a ni.

Beiseina thar chu

Tun ṭuma India team erawh a dang ta hle. Batting-ah ringawt an innghahna a ni tawh lo a, bowling bakah fielding thlengin an ṭha vek tawh. Kum 2003-a Australia an champon ṭuma opener Matthew Hayden an kawmna hian India batter-te thiamzia a pholang.

Hayden hi tun WC-a a kawppui tur an thlantir a; South Africa chhuanvawr Quiton de Kock aiin David Warner a kawppui châk zawk. Mahse, Shubman Gill a rawn lan chuan Indian batter hi Dawid Malan, Devon Conway, Kusal Perera, Litton Das, Imam-ul-Haq, Rahmanullah Gurbaz bakah Australian batter Mitchel Marsh te aiin a thlang vek. A tawpah Gill a thlauh thla a, a thlan zawk chu Rohit Sharma a ni.

India tana bul ṭan tur chu Gill leh Rohit te an ni a, pathumna Virat Kohli hi chu tun WC chauh ni loin cricket awm tawha batter ṭha bera ngaitu pawh an awm hial ang. Shreyas Iyer, KL Rahul, Suryakumar Yadav leh Ravindra Jadeja te thleng pawhin an ṭha em em vek. Mahse, tailender te erawh run siam kawngah chuan an ṭha tawk ṭhin lo.

Chutihrualin India bowler-te hian an hna ber, bowling erawh an tlin hle. Jasprit Bumrah (18) hi ṭha bera ngaih a ni a, wicket la hnem ber erawh Mohammed Shami (23) a ni thung. India ram pitch-a khelh a ni miau a, vawm vir thiam Ravindra Jadeja leh Kuldeep Yadav te hi team chakpui thei an ni a, Mohammed Siraj hi midang pali ai hian a hnufual chuang lo. Sawiselna tur zawn dawn chuan ball vawm thiam bik hi panga chauh an ni a, inkhel pressure sangah catpain Rohit-a'n risk a lak ngam a rinawm loh - bowler panga hian over 10 ṭheuh an vawm ṭheuh a rinawm.

Aussies an ni tlat

India ṭhat ber lai tia a sawi theih laiin Australia erawh an tlak hniam lai a ni a, mah se Aussies an ni tlat a, an team hian belhchian an la dawl hle. Spinner Adam Zampa hian wicket 22 a la tawh a, Shami aiin wicket khat chauhin a la tlem. Maiden (over khata run siam tir miah loh) ngah ber pawh Aussies bowler Josh Hazlewood a ni a, pace bowler dang Pat Cummins leh Mitchell Starc te nen an inkawp avangin anni aia ṭha an awm chuang lo. Spinner Glenn Maxwell leh a ṭul dan a zira vawm thei Travis Head te an awm bawk.

India bowler-te aia Australia bowler-te thlang zawk an awm a nih pawhin thil mak a ni lo. Aussies hian India leh South Africa hneh loin bul an ṭan a, a bak ram pasarihte chu an hneh vek. An hneh loh zinga pakhat zawk Proteas chu semifnal-ah an hneh let tawh a, hmasawn zawnga an kal avangin an khelh ṭhat ber ṭum hi final a ni thei a, India tan fimkhur a ṭul dawn.

Australia batter Steve Smith leh David Warner te hi ball tampering vanga thla 12 chhung an hrem tawhte kha an ni a, an thil tihsual hi lian viau mah se an theihna a san em avangin an hrem zawh chuan ram tana khel tura koh let an ni. Anni thlazar hnuaiah hi chuan Travis Head, Mitchel Marsh leh Marnus Labuschagne te hi player ṭha zawk an ni thei ang. Afghanistan laka chakpuitu Glenn Maxwell an kawl tih hriat a ṭha bawk.

Kil hrang hrang aṭanga khaihinin mahni muala khel tur India chu ṭha zawka ngaih an ni a, mahse final a ni tlat - pressure a tam tawh. Vawi sarih final khelh tawh aṭanga vawi nga champion thei Aussies hi dah hniam suh ang che.