A tawp thleng zo lo South Africa
South Africa-in Cricket World Cup-ah vawi khatmah final an la lut lo a, kuminah pawh a danglam lo. Ningani zan khan Proteas hian vawi nga champion tawh Australia chu wicket thumin an hneh lo a, semifinal-a vawi nga an chak lohna a ni.
Eden Gardens-a team pahnih an inhmachhawn hma hian Lucknow-ah an inkhel tawh. Inelna bul ṭan ṭha South Africa hian bat hmasain 311/7 runs an siam a, over 40.5 lekah Australia hi 177 runs an siam tihin an vawm hlum vek. Proteas hi 134 runs ngawtin an chak a, inelna bul an ṭan dan thlirin nomawi em an chawi pha lo a nih pawhin final tal chu an thleng turah a ngaih theih.
Mahse, South Africa tan vanduaiin tawp intai a nei lo emaw tih mai tur a ni. Kum 1992 aṭang khan inelna inchhawkin Proteas hian semifinal an lut ziah a, a vanduai zawkah an ṭang ziah bawk.
Mittui a tla
Semifinal-a an chak loh hmasak ber hi ruah vang a ni a, over 43-naah ruah a rawn sur. Proteas hian England hneh turin ball 13-ah 22 runs an mamawh a, ruahsur vanga over hnih an chan hnuin chak turin ball khatah 21 runs an siam a ngai - thawhchhuah ngaihna a awm lo.
Kum 1999-a Australia an hneh loh dante kha tun thlenga sawi hlawh a ni a, Aussies hian bat hmasain 213 runs an siam. Proteas hian ball thum a la awmin chak turin run khat chauh an mamawh a, mah se Allan Donald a 'run out'. Team pahnih an inhnehtawk a, Australia hi Super Six-a an run rate a ṭhat zawk avangin final an lut. Kum 2007-ah pawh Proteas hian Australia tho an hneh lo a, chutihrualin hemi ṭumah hi chuan Aussies hi an chungnung zawk hrim hrim.
Kum 2015-ah pawh South Africa hi inelna thlengtu New Zealand lakah semifinal-ah tho an vanduai a, ruahsur bawkin inkhel kalhmang a tidanglam. Proteas hian over 43-ah 281/5 runs an siam a, chakpui tham a ni. Ruahsur vangin DL method hman a ni a, New Zealand tan chak turin 298 runs siam a ngai. Black Caps hian thil theih loa ngaih hi 42.5 overs-ah an tlin a, WC knockout-a target umpha sang ber an ni.
Ṭah a ṭul leh ṭhin
Kumin inelnaah South Africa-in semifinal an lut leh a, India an hmachhawn hma zawnga an khelh dan chu champion zia dik tak a ni. Mahse, boruak sangah South Africa an irhfiak leh tlat. Semifinal-ah hian ṭhumvawrah an chak a, bat hmasak an thlang. Top order ho an mualpho a, tun inelnaa run siam tam ber dawttu Quinton de Kock-a'n run thum chauh a siam. Captain Temba Bavuma-a'n run khat pawh a siam lo. David Miller-a'n century a siam zarah Proteas-in 212 runs an siam a, over 50 pawh bat tluan thei loin ball hnih a la bang.
Australia tan target hi a hniam hretin a lang a, opener pahnih Travis Head (62) leh David Warner (29) ten bul an ṭan chhiat loh avangin Proteas tan beisei a bo hman. Mahse, Aussies batting line up a tlu chhia a, Afghanistan laka hero Glenn Maxwell pawhin run khat chiah a siam. Hun harsaah hruaitu ṭha an rawn lang a, captain Pat Cummins (14) leh Mitchel Starc (16) ten a tawp an thleng a, over 47.2-ah 215/7 runs siamin final an invaw thleng hram.
Aussies hian ball 16 lai an dah ban avangin chak nuamsa anga lan theih dan a awm a, mah se a tak ramah chuan Starc emaw Cummins emaw pawh hi a tawp thleng lo se, Australia tawpna hi semifinal a ni thei. South Africa a vawi nga nan semifinal-ah an vanduai a, an bul ṭan dan an thlir phei chuan pawi tih a zual tulh tulh ang.