Final khelhna tur Narendra Modi Stadium

Gujarat khawpui Ahmedabad-a stadium hi India prime minister Narendra Modi hming chawiin Narendra Modi Stadium tih a ni a, Motera Stadium tiin hriat lar a ni bawk. Kumin World Cup opening match khelhna kha a ni a, a bul ṭanna hi a hmawr bawkna tur a ni bawk.

Narendra Modi stadium hi February 24, 2020-a hawn kha a ni a, chutihrualin helai hmun hian sulhnu erawh a a nei ṭha hle. Motera Stadium awm hma hian Sardar Patel Stadium a awm ṭhin a, kum 1982 aṭanga 2015 chhung khan India rama stadium ngaihhlut zinga mi a ni. India ramin World Cup a thlen kum 1987, 1996 leh 2011-ah khan Sardar Patel Stadium hi an hmang vek.

Kum 2015-ah a thar ṭha zawk sa turin stadium hi an ṭhiat a, an sak nan hian kum nga an hmang. Mipui 132,000 an leng a, Melbourne Cricket Ground khumin khawvela cricket stadium lian ber a ni. A sakna mana sum sen zat pawh hi cheng nuai 80,000 daih a ni a, khawvel huap pawhin a chhuanawm tham hle.

Narendra Modi stadium-ah hian ball a kal muan ṭhin avangin spin a pui a, chawhrualin scoring rate pawh hi 5 runs per over hnuai lam a ni ṭhin. Chumi awmzia chu over 50-ah 250 runs aiin an siam tlem ṭhin a, amaherawhchu tun hnaiah ball kal a chak hret a, run pawh an siam tam tawh zawk. Pitch hian spinner-te a pui kan tih rualin run ṭhahnem tak siam hi a theih.

Cricket-ah ṭhumvawr a pawimawh a, Narendra Modi stadium-ah hian eng nge ṭha zawk ang le? an khelh tawhna aṭang chuan vawm hmasak leh bat hmasak hi a inang chiah. ODI vawi 30 khelh tawhah bat hmasa vawi 15 an chak a, vawm hmasa vawi 15 tho an chak.

Tun World Cup bik thlir chuan vawm hmasak thlang New Zealand leh India ten an khingpui England leh Pakistan te an hneh. England erawhin vawm hmasak an thlang a, Australia an hneh lo. Afghanistan chiahin bat hmasak an thlang a, bat hnuhnung zawk South Africa an chak. Match li khelh tawhah bat hnuhnung zawk vawi thum an chak a, mahse bat hmasa zawk chunga chak hi final-a India khingpui tur Australia an ni.