Delhi FC lakah Aizawl FC an zawr
RG Stadium-ah nimin khan tun season-a I League match hmasa ber khelh a ni a, Aizawl FC an mualpho. AFC coach hlui Yan Law enkawl Delhi FC chuan Mizo club hi 5-1 in an sawp.
Aizawl FC hian khualmualah Sreenidi Deccan leh Neroca te an hneh avangin inrintawkna nasa tak an nei a, Delhi FC lakah pawh chak tura ngaih an ni. Mahse, Mizo club-in chawlh hahdamna hun an nei lo a, inkhelh niah ruah a sur nasa bawk.
RG Stadium-ah grass phah thar a nih avangin inkhelh a la harsa a, ground ball-a inkhel ṭhin Mizo an buai phah hle. Harsatna belhchhah turin inkhelh hnuhnung pahniha khel ṭha Brazilian defender Gustavo a inhliam a, squad-ah pawh a awm lo.
Mizo club-in bul an ṭan fuh lo a, Gourav Rawat-a'n minute 23 chhungin goal hnih a khung. First half-ah 2-0 a ni a, Mizo club-in Delhi tlarhnung an tibuai pha meuh lo.
Mahse, second half ṭan chiahah R. Lalthanmawia'n goal mawi bik a khung a, Aizawl FC an phur phah hle. Mahse, Brazilian midfielder Aroldinho a rawn khalh tlang a, minute 61-naah 3-1 a ni.
Hemi hnu hi chuan Aizawl FC an tlusawp a, Delhi FC tan Brazilian midfielder Barboza leh Egyptian defender Alaa hmangin an khung belh. Mizo tlangval K. Vanlalhriatzuala telna Delhi 5-1 in an chak. Coach Yan Law-a'n inkhelh banah Hriatzuala khelh dana a lawm thu Vanglaini a hrilh.
Aizawl FC an inkhel lehnghal dawn
Vawiin chawhnu dar 2:00 hian RG Stadium-ah Aizawl FC an inkhel lehnghal dawn a, Toyota MPL10-ah champion lai Chawnpui FC an hmachhawn dawn a ni.
I League club hi an khelh zawn dawn avangin a harsa dawn a, chutihrualin nimin inkhelah hian Lalramsanga, Joseph Lalvenhima, Joel B. Lalramchhana leh Rohmingthanga te squad-ah an awm lo a, bench-a ṭhu tluan ho nen phei chuan team ṭha tak an chhawp chhuak thei dawn.
Chawnpui FC hi coach Lalrindika Hmar enkawl a ni a, training an nei ṭha. Champion nawn ngei tumin inbuatsaihna an nei a, player pawh an nei ṭha. Chawnpui hian Santosh Trophy-ag Mizo player pahnih Vanlalthanga leh Laltluangliana te an thawh a, anni pahnih hian hmun pawimawh an chang ang.