Djokovic leh Sinner an tlang

ATP Finals khelh laiah Jannik Sinner chuan Holger Rune a hneh a, semifinal a luh chian bakah an inkhel result avang hian Novak Djokovic chu a sang zual pali zingah a inhlangkai ve thei ta chiah bawk.

Ningani zan group match inkhelah Djokovic hian Hubert Hurkacz chu 7-6 (7-1), 4-6, 6-1 in a hneh, world number 1 hi a match vawi hnihnaah a chak lo a, match thumnaah set a hloh bawk.

Hnehna chang tho mah se Djokovic hi a tlang nghal mai lo, group match hnuhnung zawkah Sinner a chak a ngai. Novak duhthusam ang ngeiin Italian tlangval Sinner hian Rune chu 6-2, 5-7, 6-4 in a hneh a, table hmahruaitu ni chungin a tlang.

Italian tlangval zinga ATP Finals-a semifinal lut thei hmasa ber Sinner chuan, "Tournament kan khelhna Turin khawpui hian ka thinlungah hmun pawimawh tak a chang, kan ram mipui ho hmaa hetiang thil ka ti thei mai hian rilru pawh a hneh.

"Khelh hmabakah hian ka zinkawng a tawp loh hram ka beisei a, match khelh tur pahnih la awm turah ka ngai, chumiah chuan a ṭha thei ang bera khelh ngei ka tum," tiin final thlen ngai a tum thu a sawi.

A zawna match 19 a chak theihna kha Djokovic-a'n Sinner lakah a hloh a nih kha, a hnua match a khelh leh hmasak berah pawh a chak nuamsa lo - hliam vanga inhnukdawk Stefanos Tsitsipas aiawhtu Hurkacz hi a hneh hram.

Kum 36 mi Djokovic hian ATP Finals nomawi hi vawi ruk a chawi tawh a, champion hnem lamah Roger Federer nen an intluk, kuminah hian a champion leh thei a nih chuan record duhawm a siam dawn a ni.

Grand lam vawi 24 champion tawh hian world number 1 ni chungin kum tawp a hmang dawn tih a chiang tawh bawk a, season thara Australian Open an khelh hunah pawh seeded pakhatna ni turin a dinhmun a ṭha.

Red Group lam aṭangin Daniil Medvedev chuan semifinal a lut chiang tawh a, nizan khan hmunruak dang pakhat la awm chu chinfel a ni ang. Carlos Alcaraz leh Alexander Zverev ten beisei an la nei ve ve a ni.